Л.Зэндмаа: Тендерээр авах маск нь лабораторид ажиллах хүн зүүх зориулалттай учраас ийм үнэтэй

Нийслэлийн эрүүл мэндийн газраас зарласан тендерийн асуудлаар НЭМГ-ын орлогч дарга Л.Зэндмаа тайлбар хийлээ: 

"Эрүүл мэндийн сайдын эрх шилжүүлсний дагуу НЭМГ-аас 20.000 төгрөгөөр  20.000 ширхэг маск авах эрх шилжиж ирсэн байгаа. Энэ шилжиж ирсэн үнийн дүнгээр НЭМГ тендер зарласан. Эрүүл мэндийн яамны Төрийн нарийн бичгийн даргын баталсан эмнэлгийн техник хэрэгслийн тодорхойлолт гэж байдаг. Энэ тодорхойлолтын тусгай шаардлагын дагуу тус тендерийг зарласан. Та бүхэн нэг зүйлийг ойлгох хэрэгтэй. Энэ N95 гэдэг маск дотроо маш олон төрөл байгаа. Эмч, сорьц авж байгаа, лабораторид ажиллаж байгаа хүн зүүх зориулалттай маск юм. Энэ маш сайн үзүүлэлт, шүүлттэй маск юм. 

Тус маскийг юунд хэрэглэх гэж байгаа вэ гэхээр зургаан дүүргийн эрүүл мэндийн төв дээр Молекул биологийн лаборатори байгуулагдаж байгаа. Энэ лабораторид ажиллах хүмүүст зориулсан маск байгаа юм. Бид нарт хугацаа богинохон байсан. ЭМЯ-наас тендерийн эрх шилжиж ирээд зохих журмын дагуу Сангийн яамнаас зөвшөөрөл аваад пүрэв гарагт зарласан.  400 мянган иргэнийг шинжилгээнд хамруулахтай холбоотойгоор бэлэн байдлаа хангах шаардлага зайлшгүй гарсан. Эндээсээ үндэслээд хугацаагаа богино зарласан.  

Богино хугацаанд зарлаад, их мөнгө идэх гээд байх шиг байна гэсэн ойлголт гарч байна. Ийм биш юм шүү. Лабораторид шинжилгээ хийх гэж байгаа хүн маань зүүх зориулалттай N95 маск юм шүү гэдгийг ойлгоорой. Хүмүүс хувийн ашиг сонирхол байна гэж хэлж байх шиг байна. Ямар ч хувийн ашиг сонирхол байхгүй." гэв.