ОСЛЫН ГАЗАР: Таван хүний гурав нь нас барж, хоёр нь эмнэлэгт хүргэгджээ

Дулааны шугам сүлжээний худагт халуун усны хоолой задарч, гурван хүн амиа алдсан ноцтой осол гарчээ.

Тодруулбал, өчигдөр нийслэлийн Баянгол дүүргийн 5 дугаар хороо, Экогийн 26 дугаар байрны дэргэд дулааны шугам сүлжээний худагт халуун усны хоолой задарч дотор нь байсан хүн гарч чадахгүй байна гэсэн дуудлага Онцгой байдлыг газарт ирсэн байна.

Дуудлагын дагуу нийслэлийн Аврах 105 дугаар ангийн алба хаагчид очиход тус байрны дэргэдэх дулааны шугам сүлжээний худагт халуун усны шугам задарч дотор нь нийслэлийн Баянзүрх дүүргийн харьяат иргэн 43 настай, эрэгтэй болон 41 настай эмэгтэй, мөн хэн болох нь тодорхойгүй нэг эрэгтэй хүн амиа алдсан байсныг гаргаж, тус дүүргийн Цагдаагийн 2 дугаар хэлтэст хүлээлгэн өгчээ. 

Уг ноцтой ослын мэдээллийн дагуу өнөөдөр 10.00 цагийн орчимд манай сурвалжлах баг ослын газар дээрээс шууд дамжуулалт хийж, нөхцөл байдлыг газар дээрээс нь мэдээлсэн.  Энэ үед шүүх шинжилгээний хүрээлэн, онцгой, цагдаагийн байгууллагын ажилтнууд газар дээр нь ажиллаж байв.

М.Мөнхшүр:Таван хүний гурав нь нас барж, хоёр нь эмнэлэгт хүргэгдсэн

Уг мэдээллийн дараа  ЦЕГ-ын Хэвлэл мэдээллийн төвийн ахлах мэргэжилтэн, ахлах дэслэгч М.Мөнхшүрээс тодруулахад “Баянгол дүүргийн цагдаагийн хоёрдугаар хэлтэс  хэргийн газарт бусад байгууллагатай хамтран ажиллалаа. Тухайн хэргийн газар таван хүн байсан нь тогтоогдсон. Үүнээс гурав нь нас барж, хоёр нь биедээ бэртэл, гэмтэл авсан. Одоо Гэмтэл, согог судлалын үндэсний төвд хэвтэн эмчлүүлж байна. Шалгалтын ажиллагаагаар Баянзүрх дүүрэгт оршин суух хаягтай 41 настай У, эрэгтэй Э, хэн болох нь тогтоогдоогүй иргэн нас барсан байна. Биедээ тодорхой төрлийн гэмтэл авсан хоёр иргэн Дархан-Уул аймгийн харьяа 47 настай эрэгтэй, Ховд аймгийн харьяа 26 настай Ц болох нь тогтоогдсон. Тухайн таван иргэн нь гэр оронгүй гэх мэдээлэлтэй шалгалтын ажиллагаа үргэлжилж байна” гэв.