Сурвалжилга: Мах ТАНСАГ ХЭРЭГЛЭЭНД тооцогдож, иргэд ХҮҮХДЭЭ ХООСОН ХОНУУЛАХГҮЙН тулд дайвар бүтээгдэхүүн, хаягдал гоймон хэрэглэж байна

Нийслэлд олон удаагийн хөл хорио тогтоосноор иргэд тогтвортой ажил хөдөлмөр эрхлэх боломжгүй болж, олон өрх эдийн засгийн хүндхэн байдалд байна. Нийслэлийн хүн амын талаас илүү хувь нь гэр хороололд амьдарч байна. Тэгвэл хотын захын гэр хорооллын иргэд ямар байдалтай амьдарч хоногийн хоолоо залгуулж байгаа талаар хүргэе

Хүнсээ олон хоногоор биш өдөр өдрөөр нь худалдан авдаг болжээ. Хоногийн хоолны материалаа дэлгүүр худалдааны төвүүдээс худалдаж авах нэгэн байхад багахан хүнс зээлэх нэгэн ч байна. Цалингаас цалингийн хооронд, хүүхдийн мөнгө буухаар өгнө хоолгүй хонох гээд байна гээд гуйсан хүнд зээлэхээс өөр арга байдаггүй хэмээн худалдаа эрхлэгчид хэлж байв.
Иргэдийн худалдан авах чадамж доройтож, худалдан авах бараа бүтээгдэхүүний нэр төрөл ч хумигдаж, өөрчлөгджээ.
Махны үнэ өссөнөөр тансаг хэрэглээнд тооцогддог болсон. Дайвар бүтээгдэхүүнүүд эрэлттэй болж, хямдыг нь бодон хаягдал гоймон, хуучин ногоо авдаг байна.
Махын бүхлээр худалдан авах чадамжтай хүн бараг байхгүй болсон учраас үеэр нь тасалж зардаг болсон. Хүмүүс ихэвчлэн 200-500 граммаар худалдаж авдаг, эсвэл хямд төсрөөр нь дайвар бүтээгдэхүүн авдаг болсон гэлээ.
Иргэдийн эдийн засгийн чадамж ямар байгаа нь гурил будаагаа килограммаар, сонгино, төмсөө ширхэглэж, байцаа таллаж авч байгаагаас ойлгомжтой харагдана.
Ковид-19, цар тахлаар өвчилсөн нэг өвчтөн хүн хөнгөнөөс хамаарч 6.7-8 сая төгрөг зарцуулж байгаа гэдгийг мэргэжлийн байгууллагууд өгч байсан.