177 тэрбумаар хагас коксын ТАВАН ҮЙЛДВЭР оруулж ирэх боломжтой

-Бондын мөнгөний зарцуулалтыг Нийслэлчүүдээс асууя-

Нийслэлээс босгох 500 тэрбум төгрөгийн бондоос 177 тэрбумыг нь БНХАУ-аас хагас кокс худалдаж авна гэдгээ Эрчим хүчний сайд Б.Чойжилсүрэн өчигдөр Нийслэлийн ИТХ-д танилцуулсан билээ.

Нийслэлийн тулгамдсан асуудал утаа мөн үү гэвэл мөн. Утааг бууруулахын тулд хагас кокст шилжинэ гэдгийг Засгийн газар хэдэн жилийн өмнөөс нэг бус удаа мэдэгдэж байсан. Энэ мэдэгдлийг сонсоод “Дотооддоо үйлдвэрлэх зорилт тавиад хэрэгжүүлээд эхэлж” гэж тусгаж авсан хүмүүсийн хувьд Эрчим хүчний сайдын мэдэгдэл том цохилт боллоо. Нүүрс, тэр тусмаа коксжих нүүрсний нөөцөөр баялаг манай улсын хувьд гаднаас хагас кокс худалдаж авна гэж хэний ч санаанд орохгүй нь лав шүү дээ.

Хятадын жирийн бизнесмэнүүд хилийн цаана хэд, хэдээр нь барьж, манай монголчууд хүртэл хөрөнгө оруулж, хувь эзэмшиж болоод байгаа үйлдвэрийг Засгийн газар өөрөө, эсвээс хувийн хэвшилтэй хамтраад хийж чадахгүй гэж бодох нь үнэндээ гэнэн хэрэг. Өөрөөр хэлбэл, энэ нь хилийн цаана хувь эзэмшилтэй монгол хүний бизнес, нэг бол урд хөршөөс хүчээр тулгаж байгаа маш таагүй бодлого гэж харахаас өөр арга алга.

Ядаж хагас коксын үйлдвэр бариагүй байж Гангийн үйлдвэр гэж ярьж байгаа нь ч худал хэрэг болох юм.

Мэргэжлийн хүмүүсийн ярьж байгаагаар, Улаанбаатар хотыг хангах хэмжээний хагас коксын иж бүрэн үйлдвэрийг 10 сая ам.доллар буюу 35 тэрбум төгрөгөөр БНХАУ-аас оруулж ирэх боломжтой аж.

Өөрөөр хэлбэл, хагас коксын таван үйлдвэр оруулж ирж хүрэлцэх мөнгөөр туршилт хийх гэж байна.

Тиймээс энэ асуудлыг нийслэлчүүдээс асууж шийдвэл ямар вэ гэсэн санааг илэрхийлж байна. Нүүрсний утааны гол хохирогчид нь нийслэлчүүд учраас мөнгөөрөө юу хийхийг нийслэлчүүд шийдэх эрхтэй шүү дээ.

Иргэдээсээ саналыг нь авч, асуудлаа эрэмбэ дараатай, олонхиороо шийддэг боломжийг олгох цахим сайт, платформ хөгжүүлэх шаардлага тулгарсныг ч энэ явдал харуулж байгаа бус уу.