Иргэн Н.Анхзаяагаас 2024 оны арванхоёрдугаар сарын 12-нд “Нийтийн өргөдөл, гомдлын систем”-д байршуулсан, Засгийн газрын 2024-2028 оны үйл ажиллагааны хөтөлбөрийн 3.32.8-д тусгагдсан "Нарансэвстэй боомтыг сэргээх, нээх" заалтыг хасуулах гомдлыг өчигдрийн байдлаар 33,040 иргэн дэмжжээ.
Ингэснээр шаардлагатай 33.000 иргэний гарын үсэг бүрдэж, УИХ дээр ажлын хэсэг байгуулж, уг асуудлыг төр засгийн түвшинд авч хэлэлцэх боломж бүрдсэн байна.
Иргэн Н.Анхзаяа өргөдөлдөө “Нарансэвстэй боомтыг сэргээх, нээх” үйл ажиллагааг Засгийн газрын үйл ажиллагааны хөтөлбөрөөс хасаж, Монгол төр хагас зуун жил дархлан хамгаалсан Говийн их дархан цаазат газрыг бүрэн бүтнээр нь ирээдүй хойч үед өвлүүлэн үлдээж Монгол Улсын иргэдийн өмнө төдийгүй олон улсын өмнө хүлээсэн үүргээ биелүүлэхийг шаардсан юм.
Нарансэвстэйн боомт нь Говийн их дархан цаазат газарт байрладаг. Говийн их дархан цаазат газар нь 1975 оны АИХ-ын Тэргүүлэгчдийн 84 дүгээр зарлигаар байгуулагдсан ба 1991 онд НҮБ-ын ЮНЕСКО-гийн Хүн ба шим мандал хөтөлбөрийн шийдвэрээр Олон улсын шим мандлын нөөц газарт бүртгэгдсэн, унаган байгаль, мазаалай, хавтгай, хулан, хар сүүлт зэрэг олон зүйл ховор амьтдын өлгий, дэлхийд данстай газар нутаг юм.
Эдгээрийн дотор мазаалай зөвхөн Монгол оронд, хавтгай Монгол, Хятадын нутагт цөөн тоотой орших ба тархац нутаг хязгаарлагдмал, популяцийн хувьд устах аюулд орсон амьтад юм. Эрдэмтдийн судалгаагаар манай оронд мазаалай 50 хүрэхгүй, хавтгай 600 толгойгоос хэтрэхгүй. Нарансэвстэй боомт нь Дархан цаазат газрын А хэсэгт хамаарах бөгөөд 1992-1993 онуудад 4 удаа нээж ажиллуулаад, 1998, 2002 онуудад УИХ, ЗГ-ын ажлын хэсэг ажиллан “боомт нээх нь байгаль орчинд сөрөг нөлөөлөл ихтэй, нөгөө талаар эдийн засгийн болон бусад давуу тал, онцгой ач холбогдолгүй” хэмээн дүгнэж ахин нээх асуудлыг дэмжээгүй байдаг.
Иргэн Н.Анхзаяагаас гадна байгаль орчны хуульч Т.Цэрэн Засгийн газрын 2024-2028 оны үйл ажиллагааны хөтөлбөрийн 3.32.8-д "Нарансэвстэй боомтыг сэргээх, нээх" гэж тусгагдсан нь Монгол Улсын Үндсэн хуулийн:
-Нэгдүгээр зүйлийн 2-д “...Ардчилсан ёс, шударга ёс, эрх чөлөө, тэгш байдал, үндэсний эв нэгдлийг хангах, хууль дээдлэх нь төрийн үйл ажиллагааны үндсэн зарчим мөн…”,
-10 дугаар зүйлийн 2-д “...Монгол Улс олон улсын гэрээгээр хүлээсэн үүргээ шударгаар сахин биелүүлнэ…”,
-3-д …Монгол Улсын олон улсын гэрээ нь соёрхон баталсан буюу нэгдэн орсон тухай хууль хүчин төгөлдөр болмогц дотоодын хууль тогтоомжийн нэгэн адил үйлчилнэ…,
-70-р зүйлийн 70.1-д “...Үндсэн хуульд хууль, зарлиг, төрийн байгууллагын бусад шийдвэр, нийт байгууллага, иргэний үйл ажиллагаа бүрнээ нийцсэн байвал зохино...” гэсэн заалтыг зөрчиж байна гэж үзэж Үндсэн хуулийн цэцэд хандаад байгаа юм.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна