Ч.Ундрам: Ерөнхий сайд АТГ-ын даргад З.Дашдавааг санал болгосон ч Парламентын гишүүд хараат бусаар шийдвэрээ гаргах ёстой

АТГ-ын томилгооны асуудлаар УИХ-ын гишүүн Ч.Ундрамаас тодрууллаа.

-АТГ-ын даргыг улираан томилох Ерөнхий сайдын саналыг МАН-ын бүлэг дэмжсэн. Таны хувьд энэ асуудалд ямар байр суурьтай байгаа вэ?

-Миний хувьд энэ шийдвэрийг дэмжихгүй байгаа. Монгол Улс Авлигын төсөөллийн индексээр дэлхийн 130 улсаас 121 дүгээрт явж байна. Олон нийт сэтгэл дундуур байгаа учраас олон улсын индекс муу гардаг юм аа гэсэн тайлбарыг хийж байх шиг байна. Гэхдээ үгүй. Энэ бол олон улсад хүлээн зөвшөөрөгдсөн, тодорхой аргачлалаар тооцдог индекс. Ард түмэн авлига буураагүй гэж үзэх нь хайхрахгүй үлдээж болохгүй. Би жишээ нь, иргэн хүн. Би ч гэсэн энэ хүнд итгэхгүй байна. Энэ индекст 100 онооноос 30 оноо авсан хүнийг муу авсан гэж хэлж болно биз дээ. 

-Ерөнхий сайд өөрөө энэ хүнийг оруулж ирсэн учраа юу гэж тайлбарлаж байх юм бэ?

-Хөгжлийн банк, Ногоон автобус, Нүүрсний хэргүүдийг илрүүлж, хохирол төлүүлсэн гэдэг асуудлыг ярьсан. Гэтэл энэ хэргүүдийг АТГ илрүүлээгүй шүү дээ. Ард түмэн илрүүлсэн. Олон нийт сэтгүүлчидийн нөлөөгөөр илрүүлсэхээс  аргагүй болсон ч гэх юм уу.  

Боловсролын зээлийн сангийн асуудлаар шалгалт явуулж, бүх баримт материалуудаа АТГ-т өгсөн ч одоо болтол тодорхой ажил хийгээгүй. Зарим материалыг нь эргүүлж өгөхгүй байгаа. Ямар хэргийг нь сарын дотор шийдээд, ямар хэргийг нь хоёр, гурван жил дардаг юм бэ. Мэдээж Ерөнхий сайд өөрийнхөө бүрэн эрхийн хүрээнд асуудал оруулж ирж байгаа. Гэхдээ Парламентын гишүүд хараат бусаар асуудлыг шийдэх ёстой гэж бодож байна. 

-МАН-ын бүлэг гишүүддээ онооны систем нэвтрүүлж байгаа. Энэ талаар та ямар байр суурьтай байгаа вэ. Журам албажихаар та 10 оноогоор торгуулах нь тодорхой болчихлоо шүү дээ? 

-Би энэ журмыг нэг их дэмжихгүй байгаа.  Мэдээж, улс төрийн нэг ойлголцол, нэг ойлголцол дээр нэгдсэн. Гэхдээ энэ нь бүх асуудал дээр санал нэгдэнэ гэсэн үг биш шүү дээ. Гишүүд өөрсдийнхөө байр суурийг илэрхийлээд явах нь зүйтэй. Би одоо тав дахь жилдээ Парламентад ажиллаж байна. "Чи эсэргүүцлээ, ингэлээ, тэглээ" гэж байсан удаа байхгүй.