З.Октябрь: Аутизмтай хүүхэдтэй гээд элдвээр хараалгуулж явлаа. Гэхдээ миний хүү миний бүх амьдрал

Бид аутизмыг дэлхийд таниулах өдрийг тохиолдуулан "Бяцхан алаг үрс" цэцэрлэгийг зорилоо. 

Тус цэцэрлэг нь аутизмтай хүүхдүүдийг нийгэмшүүлэх чиглэлээр сургалтын үйл ажиллагаа явуулдаг ба бид цэцэрлэгийн эрхлэгч З.Октябрьтай хэсэг хором ярилцсан юм. 

Түүний хувьд хүүхдээ гурван настай байхад нь аутизмтай гэдгийг нь мэдсэн. Түүнээс хойш нийгмээс ирэх ялгаварлан гадуурхалт, доромжлол, хараал зүхлийг хэрхэн тэвчиж туулсан түүхээ бидэнтэй хуваалцлаа. 

-Анх хүүхдээ аутизмтай гэдгийг мэдээд ямар санагдсан бэ? Хэцүү байсан уу?

-Би анх хүүхдээ аутизмтай гэдгийг 2020 онд мэдсэн. Тухайн үед би өөрөө жирэмсэн байсан. Ковидтой жил байсан учраас надад очих газар байгаагүй. Миний очсон бүх газрын хаалга хаалттай байсан. Маш олон хаалга мөргөсөн тэр нь л надад хэцүү байсан.

Гэхдээ хүн болгонд бэрхшээл байдаг. Мэдээж надад бол сайхан байгаагүй. Надад нийгмийн хандлага маш хэцүү байсан. Хүмүүсээс ирэх дайралт, хэлж байгаа зүрх зүсэм үгнүүд нь хэцүү байсан.

Хүүгийнхээ буянд хэн миний амьдралд үлдэж байгааг, хэн нь хэн бэ гэдгийг би ойлгож авсан.

-Хамгийн хэцүү санагдаж бууж өгмөөр байсан үе бий юу?

-Тэр үеийг бодохоор уйлах гээд байдаг юм. Жирэмсний хяналтад ороод явж байхад хүү минь гэнэт эмнэлгээс гараад гүйчихсэн. Угаасаа орон зайн баримжаагүй хүүхэд болохоор шууд зам руу гараад гүйчихсэн. Тэгээд зам дээр хэвтчихэж байгаа юм. 

Тогоон чинээ том гэдэстэй хүүхэд рүүгээ очиход хүмүүс элдэв бусаар харааж байсан. Хүүхдээ замаас аваач, нэг хүүхдээ яая гэж байж дахиад нэгийг гэдсэндээ чихчихжээ гэх мэт аймар үгнүүд хэлж байсан. Тэр үгнүүдийг сонсоод л би Монголоос явах ёстой юм байна гэж бодсон. Тэгээд би Монголоос явж Туркт хоёр жил амьдраад ирсэн.

-Эцэг эхчүүд их тэвчээртэй байх ёстой бололтой?

-Тийм шүү. Асар их тэвчээр шаардана. Гэхдээ хүүхдээ өсгөж хүмүүжүүлэхэд шаардагдах тэвчээр биш. Нийгмээс ирэх хандлагыг тэвчих тэвчээр л асар их хэрэгтэй.

Гэхдээ бид чи миний хүүхдийг ойлгохгүй байна гэхээсээ илүү ойлгохгүй байгаа хүнд нэг ч гэсэн зөв тайлбарлаж, зөв ойлгуулах хэрэгтэй. Тэгж байж л энэ нийгэм сайн сайхан болно. Нэг үеэ бодвол нийгэм аутизмтай хүүхдүүдийг эергээр хүлээж авч байна. Тэд чинь энэ ертөнц дээр өөрийн гэсэн ертөнцөө бүтээгээд явж байгаа хүмүүс шүү дээ. Би гэрэлтэй сайхан ирээдүй бий болно гэдэгт үргэлж итгэдэг.