Хонины арьс нөмөрсөн "ХҮЧИРХИЙЛЭГЧ" продюсер Б.Чинбат

Урлаг соёлын ертөнцийн олон жил бугширсан идээ бээр жүжигчдийн асуудлаас эхлээд задарч эхэллээ. 

СУИС-ийн үе үеийн төгсөгчид үе хоорондын дээрэлхэлт хийж, хагас цэрэгжилтийн сургууль хэмээн дэг гэдэг зүйлийг хэрэгжүүлж, үүнээс нь болж олон хүүхэд хүсэл мөрөөдлөө орхиж, бие сэтгэлээрээ хохирсон талаар олон нийт хоёр хоног талцлаа. 

Тэгвэл өчигдөр орой "эрчүүдийн краш" гэх нэрлэгддэг дуучин Т.Мишээл шүгэл үлээлээ. 

Дуучин бүсгүй чадварлаг хоолойтой, авьяастай, гоо үзэсгэлэнтэй ч өнөөдрийг хүртэл өөрийн гэсэн хит дуугүй, ковер дуучин мэтээр явж буйг иргэд олон нийт гайхдаг байв. 

Тэгвэл энэ бүгдийн учир зангилаа тайлагдаж хөгжмийн зохиолч, төгөлдөр хуурч Б.Чинбат түүнийг продюсерлэх нэрээр найман жил хүчирхийлж,  түүний нэрийг барин хөрөнгө босгож, бүр эрчүүдтэй уулзахыг оролдож байжээ. Эцэст нь Б.Чинбат Т.Мишээлийг зодсоноор хамтын ажиллагаагаа дуусгажээ.  

Энэ талаар Т.Мишээл " Миний бие И.Мишээл нь Ц.Сарнай( Sweetymotion хамтлагийн дуучин) Б.Чинбат( МУГЗ) гэх хүмүүстэй 7,8 жилийн амьдралаа үрээд, сэтгэл санаа, мөнгө төгрөгөөрөө хохироод эцэст нь хамтран ажиллахаа больсон нь үнэн.

Мэдээж намайг анх тоож санал тавьж, би ч сонгож хамтын ажил эхлэсэн(тэр үед өөр олон газраас санал ирсэн боловч эдгээр хүмүүст итгээд сонгосон)

Энэ хоёр хүн олон нийтийн дунд асар сайн сайхнаар яригдаж, хүндлэгддэг тул хоорондоо гарсан асуудлаа бусдад дэлгэж ах эгчийгээ адлуулахыг хүсдэггүй байв. 3 охидууд нь миний төрсөн дүүгээс ялгаагүй, өсгөлцөж харж ханддаг байсан учир бас дүү нарыгаа бодоод чимээгүй байсан юм шүү. Асар удаан бодож, тунгааж, хүлээж зориг гарган үүнийг бичив.

Энэ бүх цаг хугацаанд гэрт нь цэвэрлэгч, цүнх баригч, хүүхэд асрагч, жолооч, түшээ хийсээр цаг хугацаа өнгөрсөн. Тэдний гэр бүлд туслах хүн хүч хэрэг болсон,өвчин зовлон ч тохиосон бүх цаг үед нь хамт байж хамаг сэтгэл, алтан цагаа зориулсан юм шүү. Гэр бүл, хамаатан садан, найз нөхөд тэр ч бүү хэл урлагийн ойр байсан ах эгч нар маань ч мэдхийн дээдээр мэднээ.

Мөн надад санал тавьсан олон хувь уран бүтээлчид, продакшинуудтай уран бүтээл хийж, хамтран ажиллахыг минь зөвшөөрдөггүй хааж боодог байсан.

Инээсэн, мэндэлсэн, бараг зөрөөд өнгөрсөн хүнтэй намайг хардаж есөн бусаараа доромжлуулж, хүсэхгүй байгаа зүйлээ илэрхийлэх, санал бодлоо хэлэх, уран бүтээл хийж өгөхийг хүсэх, зүгээр л бараг оршиж байхдаа ч Чинбат гэж хүнд хараалгуулж маш их дарамт дунд байсан. Урт хугацаанд сэтгэл санаагаар унаж, амиа хорлох бодол ч орж ирж байсан хүнд хэцүү цаг надад бий.

Энэ тухай Сарнай эгчид хэлж тусламж гуйхад нөхөрөө өмөөрч, УРЛАГТ УГААСАА ИЙМ ХАТУУ БАЙДАГ, БИД НАР Ч ТУУЛААД ГАРСАН гэж амыг минь барьдаг байсан. Эцэст нь иргэн Чинбат нь миний биед халдаж, зодож миний итгэл цаашдын ажил түүгээр эцэслэгдсэн (гэрчтэй).

Мөн ээж дүү 2 луу маань танай охиныг урлагт хэн ч биш болгоно, гишгэх газаргүй болгоно гэх санаатай дарамталсан, бусад дуучид, уран бүтээлчдыг доромжилсон, хаана ч хэзээ ч болоогүй зүйлсийг бичсэн мессежүүд нь одоо ч бий.

Мөн 2 ч удаа намайг ажил ярих нэрийдлээр танихгүй эрэгтэй хүнтэй уулзуулж орхиж зугтаж байсан, сүүлд л би үүний учрийг тунгааж олов. Би харамсалтай нь тэдний бодсон шиг, ашиглаж болно гэж зорьсон хүн нь биш байв.

7-8 жилийн хугацаанд 4 дуу хийж өгсөнөөс 1 нь хулгайн дуу байсан учир устгасан болно. 1 дууных нь клип нь таалагдаагүй учир ахиж шинээр хийх зорилгоор устгасан. Бусад дуунууд болон хийж байсан дуунуудийг ашиглах, дуулах эрхийг хаасан тул өөрийн Youtube сувгаас устгах нь зүй ёсны хэрэг бизээ.

Мэдээж бичигдээгүй хуулиар урлагт олон жил байснаараа, надаас ах эгч гэдгээрээ эдгээр хүмүүсийн зөв, харин миний буруу болоод дуусах бизээ.

Ямар ч байсан надаас өөр хүсэл мөрөөдлөөрөө жигүүрлэсэн, урлагт хөл тавих гэж байгаа хүүхдүүдэд ахиж бүү зовлон болоорой гэж хүсье. Чадахгүй бол чадахгүй, чадах бол чадах аа үнэнчээр хэлдэг, хүний амьдралд гай болдоггүй байгаасай.

Мөн миний нэр хүндийг ашиглаж дууны албумыг нь хийж өгнө гэж хөрөнгө оруулалт авсан 100 давсан сая төгрөгөө хүмүүст нь буцааж өгөөрэй. (Тэндээс би нэг төгрөгийг ч уран бүтээлдээ ашиглаагүй болно) Мөн миний тоглолтын орлогоос( мэдээж тэдний зохиосон дуу биш ковер дуу дуулж олсон орлого) зээлж авдаг байсан мөнгийг эргүүлж өгөхийг найрсагаар хүсье. Би мөнгө тарьдаг хүн биш. Чаддаг хүмүүст нь төлөх ёстойгоо төлөөд дуунуудаа одоо хиймээр байна.

( Ингэж бичиж байгаа нь тэдгээр хүмүүстэй холбогдох ямар ч арга байхгүй бүтэн 1 жилийн хугацаанд танихгүй дугаараас залгасан ч тасдаад блок хийдэг, тааралдаад ярилцах гэхээр зугтдаг ч "сайтуудад худал ярилцлага өгч" надтай холоос харилцахыг хүсэж байна гэж ойлгосон учир ингэхээс өөр арга байсангүй)

Мөн залуучууд ч бас хэнтэй хамтран ажиллахаа сайтар судлаж, төлөвлөөрэй гэж зөвлөе. Урлагт байгаа ах эгч нар бүгд мэдээж ийм биш надад зөвлөж туслаж байсан хүмүүс маш олон бий. Би л азгүй байж.

Мөн нийгэмд хэрүүлийн чанартай пост хийж байгаад та бүхнээсээ гүнээ хүлцэл өчье. Энэ маань нэг талаараа олон залуу уран бүтээлчдэд анхааруулга болоосой гэж хүслээ.

Шинэ залуу бидний үеэс эхлээд зэрэг хоорондын дарлал, үүгээр дуусаг" гэжээ. 

Дуучин бүсгүйн энэ мэдэгдлийг бататган Emotion багийн экс гишүүн Т.Солонго "Танил түүх байх чинь вэ. Emotion хамтлагт орж, хамт амьдарч, ажиллаж байсан сайхан гэхээсээ илүү гунигтай аймшигтай он жилүүд нүдний минь өмнүүр өчигдөрхөн болсон үйл явдал шиг дурайж байдаг шүү" хэмээв. 

Монголын ард түмэн МУГЗ  Б.Чинбатыг хүнд өвчнөөр өвдөж байхад халуун сэтгэлийн хандив өргөн, олон мянган ээж цайныхаа дээжийг өргөж байсан. Түүний эхнэр Ц.Сарнайг донор болоход бүгд түүнийг хайрлан хүндэлж байв. 

Монголын урлагийн нэгэн нүүр царай, үүрэг хариуцлагыг хүлээсэн гэр бүл хоёулаа хүсэл мөрөөдлөөрөө жигүүрлэсэн айлын бяцхан охиныг зарц боол мэт хандаж, бие сэтгэлийн хүчирхийлэлд байлгаж байсан нь харамсалтай. 

Бидний цэнхэр дэлгэцээр хүлээж авдаг инээд цалгисан, сайн хүний дүртэй бүхэн угтаа ямар ч хүн байж болохыг бид олон удаагийн жишээн дээр харлаа. 

Одоо бид Cancel Culture буюу ёс зүйн алдаа гаргасан олны танилыг урлагийн ертөнцөөс явуулж сурах цаг иржээ. Уран бүтээлийг нь дэмждэг ч хүн нь ёс зүйгүй, хүнлэг бус бол бид Cancel-даж сурах ёстой.