"Настай эмээд буян болоод бид нар төлбөр авахгүй ээ"

Биеийн байдал нь хүнд, харгалзах хүнгүй 73 настай эмээд Чингэлтэй дүүргийн эмч нар /2021.01.21. 13 цаг/ хагалгаа хийж, амь насыг нь аварчээ. 

Энэ талаар Хүний их эмч Г.Манлайбаатар "Ар гэрээс хүн байхгүй 73 настай эмээ цустай бөөлжсөн тул дурангийн баг дуудав. Нуулгүй хэлэхэд ганц бие хөгшинд ажилбар хийлгэх мөнгө хомсхон ч гэсэн яаралтай дуудлага авсан дурангийн багийнхан дуут дохиогоо хангинуулсаар хүрээд ирэв. Монгол улсын хаа сайгүй дуудагдан очиж ажилбар хийдэг миний мэдэх ганц хамт олон. Дуудагдан ирсэн дуудлаганд өвчтөн болон тэдний ар гэрийн итгэлийг алдаж байгаагүй маш чадварлаг хамт олон.

Тухайн эмээд ажилбар хийж найдвартай гэгч нь алдаж байсан цусыг нь тогтоочихоод "Ганц бие настай эмээд буян болоод бид нар төлбөр авахгүй ээ" гэж хээв нэг хэлчихээд инээгээд дараагийн дуудлагандаа яаран яваад өгөв. 

Эмээг унтуулганаас бүрэн сэрсэнийх нь дараа "Одоо айх зүйлгүй шүү, ажилбар маш сайн болсон гэхийн хамтаар танд ажилбар хийсэн эмч нар төлбөр авахгүй гэсэн шүү" гэхэд "Ямар сайхан буянтай хүүхдүүд вэ, эмээ нь маш их баярлалаа" хэмээн хүүхэд шиг л баярлаж байлаа. Энэ бол олонд хэлж байгаа нэг нь л болохоос урд нь ч бас маш олон удаа амьдралын боломж муу хүмүүст үнэ төлбөргүй ажилбар хийж өгчихөөд л яваад өгдөг буянтай хамт олон доо!

 Эрүүл мэндийн энхийн манаанд хамтдаа зогсож, зүтгэж буй хамтран зүтгэгч нар, мөн юу юунаас илүүтэй НАЙЗ-ууддаа маш их баярлалаа. Манай салбарт бас өдөр бүр эерэг зүйл болдог юм шүү" хэмээн өөрийн цахим хуудсанд бичсэн байна.