"Найман ишигний" гэх хэрэг: Нуухыг нь авах гээд нүдийг нь сохолчихов уу

Олон нийтэд "Найман ишигний" гэх нэршлээр танигдаад буй,  Л.Г, Ц.Т, Б.Д нарт холбогдох, “Олон тооны мал хулгайлсан” хэргийн Давж заалдах шатны хэргийн шүүх хуралдаан өчигдөр болж, Анхан шатны шүүх буюу Хэнтий аймгийн Бор Өндөр суман дахь Сум дундын шүүхээс гаргасан 35 дугаартай яллах тогтоолыг бүхэлд нь хүчингүй болгож шийдвэрлэсэн билээ. Ингэхдээ, шүүх хэргийг дахиж шийдэх хүртэл холбогдогч Л.Г, Ц.Т нарыг тодорхой нөхцөлтэйгөөр сулласныг олон нийт ташаа ойлгож, хэрэг цагаадсан мэтээр түгээж байна. 

Тэгвэл өмгөөлөгч Б.Мэргэн дээрх хэргийн талаарх ташаа ойлголтыг залруулахуйц, шүүхийн мэргэжлийн үг хэллэгийг энгийн байдлаар тайлбарласан мэдээллийг цахим хуудстаа оруулжээ. 

Тэрбээр “8 ишигний” гэх хэргийн давж заалдах шатны шүүх хуралдааны эхлэл хэсэг буюу өмгөөлөгчдийн гомдол, прокурорын эсэргүүцлийн үндэслэл, төгсгөл хэсэг буюу шүүхийн шийдвэр хэсгийг үзлээ.

Олон хүний ойлгоод, бичээд байгаа шиг хэрэг хэрэгсэхгүй болж суллагдсан, баяр хүргэх, нэг гэр бүл элэг бүтэн болчихсон юм алга л байна.

Анхан шатны шүүхийн шийтгэх тогтоол үндэслэлгүй болсон гэж шүүгдэгчдийн өмгөөлөгчид гомдол, прокурор эсэргүүцэл бичсэн байна. Өмгөөлөгч хэргийг хэрэгсэхгүй болгох, харин прокурор Даариймааг цагаатгасан нь үндэслэлгүй гэж давж заалдсан гэсэн үг.

Давж заалдах шатны шүүх өмгөөлөгчийн гомдлыг хүлээж аваагүй буюу хэргийг хэрэгсэхгүй болгоогүй бол прокурорын Даариймааг цагаатгасан нь буруу гэсэн эсэргүүцлийг үндэслэлтэй байна гэж үзэж хэргийг дахин хэлэлцүүлэхээр анхан шатны шүүхэд буцаан шилжүүлжээ.

Хэдийгээр анхан шатны шүүх дахиж хэлэлцээд хэрэгсэхгүй болгох боломжтой ч тэгэхгүй л болов уу. Давж заалдах шатны шүүх шууд Даариймаад ял өгөх боломжгүй тул анхан шатны шүүхийг хуралдаанаа дахиж хий гэсэн нь ял өг л гэсэн агуулга харагдаж байна.

Тэгэхээр уг нь цагаатгагдсан байсан Дайриймаа ял авах, цаашлаад хамгийн бага ял авсан байсан нөгөө хоёрын ял нэмэгдэх магадлалтай. Баяр хүргэх биш байдал дордсон л асуудал.

Анхан шатны шүүхийн шийдвэр гарснаар шүүгдэгчдийг шууд хорьдог ч давж заалдах шатны шүүхийн магадлал гарч байж шүүхийн шийдвэр хуулийн хүчин төгөлдөр болдог. Тодруулбал, анхан шатны шүүхийн хорих ял өгсөн шийтгэх тогтоол гарснаар шүүгдэгчид цагдан хорих таслан сэргийлэх арга хэмжээ авч, давж заалдах шатны шүүх шийтгэх тогтоолыг хэвээр үлдээвэл ялтан болж хорих ангид хуваарилагддаг.

Өнөөдрийн хувьд давж заалдах шатны шүүхээс анхан шатны шүүх хуралдаанаа хийтэл 2 шүүгдэгчийг хорьж шалгах шаардлагагүй гэж үзсэн учраас цагдан хорих таслан сэргийлэх арга хэмжээг хувийн баталгаа авах таслан сэргийлэх арга хэмжээгээр сольсон. Үүнийг л суллагдчихлаа, хэрэгсэхгүй болчихлоо гэж ойлгоод байх шиг" хэмээн бичсэн байна. 

Өөрөөр хэлбэл, мал хулгайлсан хэрэгтээ зүйл ангийнхаа хамгийн бага ялыг аваад байсан эхийг өрөвдсөн олон нийтийн хандлага хөгшин настай эхийг нь мөн хэрэгт хийх, ял өгүүлэх шалтгаан болсон байх вий гэдэг асуудал анхаарал татсан сэдэв болж хувирч байна.