Монголын Волейболын Идэрчүүдийн Улсын аварга шалгаруулах тэмцээнийг Дундговь аймгийн Засаг даргын ивээл доор 2025 оны зургаадугаар сарын 24-30-ны өдрүүдэд Мандалговь хотноо зохион байгуулж байна.
Тэмцээнийг Дундговь аймгийн Засаг даргын Тамгын газар, Монголын волейболын холбоо, Дундговь аймгийн волейболын холбоо хамтран зохион байгуулж байгаа бөгөөд тэмцээнд Улаанбаатар хотоос эрхээ авсан Уурхайчин, Ноён, Хилчин, Аврагч, Норт стар, Be Hawks, Залуу монгол зэрэг клубүүд, нийслэлийн дүүргүүдийн эрэгтэй, эмэгтэй тус бүр 11 баг, аймаг бүрийн салбар холбооны шигшээ багууд хүрэлцэн ирж, нийт эрэгтэй, эмэгтэй 42 баг тамирчид оролцон, хурд хүч, авхаалж самбаагаа сорин өрсөлдөж байгаа юм.
Бүх багийн тамирчдыг тэгш хүртээмжтэй, ижил нөхцөлөөр хангах чиглэл баримтлан баг тус бүрд волейболын спортод дуртай, өөрийн орон нутгийн 36 чиглүүлэгч хүүхдийг туслуулж, дөрвөн заланд зэрэг зохион байгуулж байгаа бөгөөд шууд дамжуулалтыг Монголын Үндэсний дээд лигийн шууд дамжуулалтын баг хийж буйгаараа онцлог аж.
Идэрчүүдийн Улсын аварга шалгаруулах тус тэмцээн нь хүүхэд насны хамгийн сүүлийн улсын чанартай тэмцээн байдаг тул тус тэмцээнд оролцож буй тамирчин хүүхдүүдээс ирээдүйн Монгол улсын шигшээ багийн тамирчид, мэргэжлийн тамирчид төрөн гардаг байна.
Тэмцээний нээлтийн үйл ажиллагаа энэ сарын 25-ны 19.00 цагт Мандалговь хотын цэнгэлдэх хүрээлэнд болно.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна