Ц.Амартөгс докторын зэргээ амжилттай хамгааллаа

Монгол Улсын Их Сургуулийн Улс төр судлал, олон улсын харилцаа, нийтийн удирдлагын сургуулийн докторант Цэнддаваагийн Амартөгс нь “Засгийн газрын зохист хэмжээ, чиг үүргийн хамаарлын шинжилгээ: Монгол Улсын жишээн дээр” сэдвээр Төрийн удирдлагын доктор (Ph.D)-ын зэрэг амжилттай хамгааллаа.

Хамгаалалт нь 2025 оны 8 дугаар сарын 18-ны өдөр МУИС-ийн 5-р байрны 203 тоот танхимд Төрийн удирдлага, бодлого судлалын докторын зэрэг хамгаалуулах дэд зөвлөлийн шийдвэрээр зохион байгуулагдсан юм.

Судалгааны бүтээлд Монгол Улсын Засгийн газрын зохист хэмжээг Армей муруйн загвараар тооцоолж, чиг үүргийн хамаарлыг судалж шинжлэн гүйцэтгэх засаглалын үйл ажиллагааны үр ашгийг нэмэгдүүлэх санал дэвшүүлэх зорилго тавьжээ. 

Эдийн засгийн өсөлт, засгийн газрын зарлагын хамаарлыг тодорхойлсон онолын үзэл баримтлал, олон улсын эмпирик судалгааны үр дүнг харьцуулан судалсан. Мөн онол, арга зүйд суурилсан Армей муруйн аргачлалаар Монгол Улсын Засгийн газрын зохист хэмжээг анх удаа тооцоолсон байна. Засгийн газрын зохист хэмжээ нь тухайн улсын хөгжил, засаглалын тогтолцоо, төрийн удирдлагын арга ажиллагаатай салшгүй холбоотой үзүүлэлт учир Засгийн газрын чиг үүргийн хүрээнд зарим үзүүлэлтийн хамаарлыг шинжлэн судалгаагаа өргөн хүрээнд, олон талаас нь уялдуулан хийж, дүгнэлт, санал гаргажээ.

Цаашид төрийн удирдлага, засаглалын судалгааны хөгжилд зохих хувь нэмэр оруулах, цаг үеэ олсон судалгаа болсон байна. Тухайлбал, судалгаанд хамуулах өгөгдлийн хэмжээ, хүчин зүйлсийн тоог нэмэгдүүлэн судалгааны чиглэлүүдийг өргөжүүлэх, энэхүү аргачлалыг шинжлэх ухааны дотоодын судалгааны эргэлтэд оруулах зэргээр онол, практикт ашиглах боломжийг бүрдүүлсэн суурь судалгаа болсноороо онцлог болж байгаа юм.