А.Мягмарсүрэн: Тухайн үед УУРАА БАРЬЖ ЧАДАЛГҮЙ тийм үйлдэл хийчихжээ

Архангай аймгийн 2 дугаар сургуулийн бага ангийн багш сурагчаа зодсон талаарх бичлэг цацагдаж цагдаагийн байгууллагаас тухайн багшийг шалгаж буй. 

Улмаар гуравдугаар ангийг дааж авсан А.Мягмарсүрэн ёс зүйн алдаа гаргасан хэмээн ажлаас нь чөлөөл байгаа талаар Боловсролын сайд П.Наранбаяр мэдэгдлээ. 

Эх сурвалжийн хэлж буйгаар зодуулсан хүүгийн ээж мөн сургуульд ажилладаг бөгөөд хүүгийн ээжтэй нь муудалцаж, хүүг нь зодсон гэх мэдээлэл байгаа юм. 

Бид бүхэн уг асуудалд холбогдсон багш А.Мягмарсүрэнтэй холбогдож тухайн үед юу болсон талаар тодрууллаа. 

Таныг хүүхэд зодсон талаар мэдээлэл гарлаа. Хүүхдийг ээжтэй нь муудалцсаны улмаас зодсон гэдэг мэдээлэл байна. 

-Яг тиймэрхүү зүйл болоогүй. Бид хоёрын дунд ерөөсөө үл ойлголцол байгаагүй. Сошиал дээр байгаа зүйл буруу ойлгогдоод байна. Бид хоёр нэг дор ажилладгийн хувьд ажилладаг. Гэхдээ бид хоёрын дунд муудалцаж, хувийн ямар нэгэн асуудал байгаагүй. 

Ямар шалтгааны улмаас хүүхдийг зодсон бэ?

-Яг хичээл ороод дуусчихсан байсан. Манай ангийнхан ер нь бүгд жигд юмаа хийдэг л дээ. Бүх хүүхдүүдийг хичээлийг нь шалгаад үзэж амжаагүй хэдээ дуудаад үзэхэд тэр хүүхэд маань дэвтэр дээрээ цэг ч тавиагүй сууж байсан. Тэгээд хичээлийн хийж үү гээд үзсэн чинь хичээлээ хийхгүй, балаараа тоглоод, гоожуулаад завааруулчихсан байсан. Ээж нь уг нь дотроо байдаг учраас ээж дээрээ очоод балаа аваад ир гээд шаардлага тавьсан. "Ээж маань надад бал өгөхгүй шүү дээ" гээд байгаад байсан. Тэрүүхэн тэр хооронд би жоохон ийм асуудал гаргачихлаа. 

Тухайн хүүхэд чинь гуравдугаар ангийн хүүхэд шүү дээ. Таны гарын аяыг даах уу? Тэгж өшиглөхөд бэртэж, гэмтэх эрсдэлтэй гэдгийг та мэдэж байгаа юу?

-Мэдэж байгаа. Хангалттай. 

Тухайн үед яагаад тийм үйлдэл гаргасан юм бол. Өмнө нь та хүүхэд зодож байсан уу? 

-Өмнө нь над дээр ямар нэгэн ийм асуудал гарч байгаагүй. Харин энэ удаагийн асуудал дээр... үнэхээр юмаа хийгээгүй байсанд нь л... яг бүгдээрээ юмаа хийдэг, хурдан хурдан юмаа хийгээд явчихдаг. Тэр хүүхэд ч гэсэн сүүлийн үед хөөрхөн болоод, угаасаа жоохон удаан хийдэг хүүхэд байсан ч ахиц гараад байсан байж тэр өдөр юу ч хийгээгүй хоёр цаг зүгээр суучихсан байсан. Тэгээд хамгийн гол нь өөрт нь байсан зүйлээрээ тоглоод, цагийг буруу өнгөрүүлчихсэн байсан учраас...

Ер нь сургах арга барил дээр хичээлээ хийхгүй байвал зодвол илүү сурдаг, юмаа ойлгодог гэдэг ойлголт байдаг юм уу? 

-Үгүй тийм ойлголт бол байхгүй. Тэр өдөр тухайн хүүхдэд л жоохон тийм шаардлага тавьчихаж. 

Таны хувьд хийсэн үйлдэлдээ гэмшиж байна уу? 

-Өөрөө яг үүндээ гэмшээд. Тухайн цаг үедээ юу болсноо өөрөө сайн ойлгохгүй байж байгаад өчигдөр нийгмийн сүлжээнд цацагдахад өөрийгөө хараад бүр үнэхээр... Өөрөө хариуцлагаа хүлээгээд өөрөөсөө байж болох бүхий л зүйлээ өөрийнхөө хэмжээндээ хийчхээд эргээд надад хариу өгнө гэсэн. Хүлээгээд л байж байна. 

Зодсон хүүхдийнхээ эцэг эхтэй та уулзсан уу?Тэр хүмүүс нь гомдол гаргасан уу?

-Ээжтэй нь байнга л холбоотой байгаа л даа. Өөрсдөө дотроо ажилладаг болохоороо сая хүртэл над руу чат бичсэн л байна. Тэгээд хүүхэдтэйгээ бол уулзсан ямар нэгэн биед нь бэртэл гэмтэл гараагүй. Ямар ч байсан өнөөдрийн байдлаар өөрөө хариуцлагаа хүлээгээд тухайн ажилдаа өргөдлөө өгчхөөд өргөдлийг маань шийдэж өгөхийг хүлээгээд байж байна. Одоо цагдаа дээр асуудалтай байгаа, цагдаагаас ямар нэгэн шийдвэр гараагүй байгаа болохоор мэдэхгүй л байна. 

 Таны хувьд хэдэн жил багшилж байгаа вэ? 

Би 10 жил ажиллаж байна. Гэхдээ 8 жил багшилж байна. 

10 жил багшлахдаа яг ийм нөхцөл байдал гарахад хүүхэд хичээлээ хийхгүй байхад яг ямар арга хэмжээ авч ирсэн юм бэ?

Ер нь манай ангид эхнээсээ миний гар дээр явчихсан тохиолдолд хичээлээ хийхгүй үлддэг тийм зүйл болдоггүй. Угаасаа гардаггүй л дээ. Саяны шавь маань хоёрдугаар ангиасаа орж ирсэн. Эхнээсээ жоохон  агуулгын хоцрогдол ихтэй байсан учраас бид маш их цаг хугацааг энэ хүүхдэд зориулаад хоёулаа нийлээд ахицтай явж байсан. Энэ өдөр л харин буруу юм болчихлоо. 

Нийгмийн сүлжээнд таныг маш их буруутгаж ярьж байна. Та бас их цочирдож байгаа байх. Бичлэг гараад ирэхэд танд яг юу гэж бодогдов?

Тухайн үед яг юу хийчихсэн юм бэ л гэж өөрөөсөө асуусан. Би сайн мэдэхгүй байна. 

Маш олон бага насны хүүхэдтэй хүмүүс үзээд эмзэглэж байна шүү дээ

Би ч бас өөрөө бага насны хүүхэдтэй. Манай ангид миний өөрийн хүүхэд байдаг. Яг үнэхээр энэ хүүхдэд маш их цаг хугацааг зориулчихсан. Энэ хүүхдийг ангийнхаа хүүхдүүдийн хэмжээнд нь авчрах гэж маш их цаг хугацааг зориулсан учраас тэр өдөр л буруу авир гаргаснаа би өөрөө мэдэж байна. Болохгүй үйлдэл хийснээ ч мэдэж байна. Өөрөө тэр үед миний хүү ээж дээрээ очоод үзгээ аваад ир гээд явуулчихсан байсан бол арай өөр л байх байсан байх. 

Үнэхээр дотор нь ажилладаг ээж нь байгаа учраас ээж дээрээ очоод аваад ир гэсэн. Миний урдаас үгэнд тайлбар тавьсан л даа тэрийг нь би сонссон. Миний ээж надад бал өгөхгүй шүү дээ гээд байхаар нь ээж чинь ажилдаа орчихсон юм чинь өрөөндөө байгаа чи аваад ир гээд хэлсэн. Тэгээд угийн жоохон гөжүүд хүүхэд болохоор буруу ойлголцол болчихлоо. 

Таны хувьд тухайн үед тэгж их уур чинь хүрсэн юм уу?

Ууг нь тэр өдөр надад стресстэж уурлаад байхаар ямар нэгэн зүйл байгаагүй л дээ. Угаасаа хичээлийн нэг улирал дуусаж байгаа учраас зүгээр бататгах хичээл орж байсан. Ямар ч хүүхдүүд өөрсдөө юмаа хийчихээр, чадчихаар хэмжээний хичээл байсан. Гэтэл тэрийг огт хийгээгүй. Тэрэнд нь л жоохон....
Арай л өндөр шаардлага тавьчихсан юм шиг байна. 

Таны хувьд энэ сургуульдаа үргэлжлүүлж ажиллахаар байгаа юу өргөдлөө өгчихсөн байгаа юу?

Өргөдлөө өгчихсөн байгаа. 

Сургуулийн удирдлагын зүгээс танд ямар арга хэмжээ авах вэ. Юу гэж хэлсэн бэ?

Одоохондоо цагдаа дээр байгаа болохоор тодорхой зүйл хэлээгүй. Чи болохгүй зүйл хийжээ гэдгийг маш сайн ойлгуулсан. Би ч өөрөө тэрийг ойлгочихсон л байсан л даа. Би маш буруу зүйл хийсэн учраас хажуугаар нь хамт олныхоо бусад багш нарынхаа талаар буруу ойлголт нийгмийн сүлжээнд өгсөндөө болдог бол бүгдээс нь уучлалт гуймаар байна. 

Үнэхээр харамсалтай байна. Миний хийсэн буруу үйлдлээс болоод бүх багш нарын маань тэр тусмаа үнэхээр манай сургуулийн нийт багш нар маань маш их хичээж ажилладаг. Нийт багш нарынхаа нэр хүндийг унагаасандаа үнэхээр харамсалтай байна.