“НҮҮДЭЛЧИН” фестивалийн үндэсний спортын тэмцээн, арга хэмжээнүүд

Монгол Улсын соёлын биет бус өвийн олон төрөл зүйл, угсаатны бүлгийн онцлогийг таниулан сурталчлах “Нүүдэлчин” дэлхийн соёлын фестиваль 2025 оны наймдугаар сарын 22, 23, 24-ний өдрүүдэд Налайх дүүргийн нутагт байх “Тайж” хайрхан уулын бэлд болно. Дөрөв дэх жилдээ зохион байгуулах гэж буй уг фестивалийн хүрээнд болох үндэсний спортын тэмцээн, арга хэмжээнүүдийг танилцуулъя.

Фестивалийн үеэр үндэсний спортын таван төрөлд өрсөлдөх бөгөөд үндэсний бөх, үндэсний сур харваа, шагай харваа, адуучин гэсэн дөрвөн төрөлд 400 орчим тамирчин оролцохоор бүртгүүлсэн бол хурдан морины уралдаанд 100 гаруй шандаст хурдан хүлгүүд тоосоо өргөхөөр бүртгүүлжээ.

• “Морьт харваа”-ны дэлхийн аварга шалгаруулах тэмцээн – “Нүүдэлчин” дэлхийн соёлын фестивалийн онцлох арга хэмжээ нь “Морьт харваа”-ны 17 дахь удаагийн дэлхийн аварга шалгаруулах тэмцээн юм. Тайж хайрхны энгэрт дэлхийн өнцөг булан бүрийн мэргэн харваачид цэц мэргэнээ сорино.
• Үндэсний шагайн харваан тэмцээн – Үндэсний шагайн харвааны өсвөр үеийн мэргэн харваачдын тэмцээн наймдугаар сарын 22-ны 10:00 цагт эхэлнэ. Харин насанд хүрэгчдийн тэмцээн наймдугаар сарын 23-ны 09:00 цагт эхэлнэ.
• Үндэсний сур харваа – Үндэсний сур харвааны насанд хүрэгчдийн ангиллын тэмцээн наймдугаар сарын 22-ны 09:00 цагт эхэлнэ. Мөн үзэгчдэд зориулсан сур харвааны талбай фестивалийн гурван өдрийн турш нээлттэй байна.
• Үндэсний бөхийн барилдаан – Үндэсний бөхийн барилдааны насанд хүрэгчдийн ангилалд хүчит 64 бөх, өсвөр насны ангилалд 15-16 насны 32 бөх зодоглоно.
• Хурдан морины уралдаан – Монгол Улсын соёлын биет бус өвийг таниулах, түгээн дэлгэрүүлэх “Нүүдэлчин” дэлхийн соёлын фестивальд их насны морьд уралдана.
• Адуучин тэмцээн – Аймаг сумдаас ирсэн адуучин залуус адуу уургалж, эмнэг булгиулж, бугуйлдаж өрсөлдөнө.
• Үзэгчдийн дундах нээлттэй тэмцээн – Фестивалийг зорин ирсэн үзэгчдийн дунд наадмын гурав дахь өдөр буюу 8 дугаар сарын 24-нд нээлттэй тэмцээн зарлана. Үзэгч олон үндэсний спортын олон төрөлтэй танилцаж, өөрийгөө сорих боломжтой.

Өнгөрсөн жилийн “Нүүдэлчин” дэлхийн соёлын фестивалийн үндэсний бөхийн барилдаанд Өвөрхангай аймгийн Уянга сумын харьяат, улсын харцага Х.Гантулга түрүүлж, хурдан морины их насны уралдаанд Төв аймгийн Аргалант сумын уугуул, аймгийн алдарт уяач Д.Батаагийн цавьдар түрүү магнайд хурдалж байсан билээ.

Харин үндэсний сур харвааны эрэгтэйчүүдийн ангилалд улсын мэргэн Т.Очироо, эмэгтэйчүүдийн ангилалд аймгийн гарамгай харваач Ч.Чимэддулам түрүүлж, шагай харвааны багийн төрөлд Дорноговь аймгийн Г.Алдар ахлагчтай “Номт даншиг Хеттрик” группийн баг, цуваа харваанд Төв аймгийн Баян сумын харьяат “Цэц баян” багийн харваач Г.Чингүүн, адуучин тэмцээнд Багануур дүүргийн адуучин Б.Бямбасүрэн нар тэргүүн байр эзэлж байлаа.