Б.Отгонбаяр: Л.Энх-Амгалан сайд орон нутгийн залуус, эцэг эхчүүд, багш нараас уучлалт гуйхгүй бол өөрийгөө ЗУЛЫН ГОЛ болгоно

Монголын Үндэсний Их Сургуулийн зүгээс Боловсрол, шинжлэх ухааны сайд Л.Энх-Амгаланг сургуулийн нэр төрд халдсан хэмээн шүүхэд өгч байгаагаа өнөөдөр мэдэгдлээ.

МҮИС-ийн удирдлагын зүгээс "БШУ-ы сайд Л.Энх-Амгалан наймдугаар сарын 26-ны өдөр их, дээд сургуулиудын талаар мэдээлэл хийхдээ Монголын Үндэсний их сургуулийг луйвар хийдэг гэж цоллосон. Энэ нь эрх зүйн хувьд доромж утгатай үг хэллэг бөгөөд гүтгэсэн үйлдэл болсон. 

МҮИС-ийн тухайд хуулийн этгээдийн хувьд нэрээ хамгаалж, нэр хүндээ сэргээлгэх зорилгоор Сүхбаатар дүүргийн иргэний хэргийн шүүхэд өнөөдөр нэхэмжлэл гарган хандаж байна. Энэхүү нэхэмжлэлийн шаардлагад нэгдүгээрт БШУ-ны сайд Л.Энх-Амгаланг уучлалт хүсэх, хоёрдугаарт няцаалт хийлгэхийг шаардаж байна. Мөн БШУ-ны сайдын хувиар тухайн мэдээллийг тараасан хэлбэр хэрэгслээр залруулга гаргах нэхэмжлэлийн шаардлагыг холбогдуулан гаргаж байна" гэв.

Энэ үеэр МҮИС-ийн багш Б.Отгонбаяр 

“Сайд маань өөрөө 10-хан секунд үг хэлэхдээ Монголын Үндэсний Улсын их сургууль гээд манай нэрийг гуйвуулж хэлж байна. Уг нь У, Ү үсэг тусдаа ялгаатай. Дээрээс нь 21 аймгийн эцэг эхчүүд багш нар, ялангуяа бага ангийн багш нар үүнд хамаатай.

Сайд маань өөрөө боловсролын газар очоод 21 аймгаар тойроод элсэлтийн албаа зохион байгуулаад хүүхдүүдтэй уулзаж байхад хэзээ ч хүүхдүүд У, Ү үсгийг андуураад байдаггүй юм аа.

Яагаад энэ үйлдэлдээ хариуцлага хүлээхгүй, өөрийн амаар Монголын Үндэсний их сургууль, Монгол Улсын их сургууль хоёрын хооронд хүүхдүүд төөрөлдөж байна гээд яагаад энэ олон мянган эцэг эхчүүдийг, 21 аймгийн багш нарыг, залуучуудыг яагаад ингэж ДОРОМЖИЛЖ байгаа юм бэ. 

Би Баянхонгор аймгийнх. Би Монголын Үндэсний их сургуульд орж ирэхдээ би МУИС гэж андуурч орж ирээгүй шүү дээ. Яагаад энэ болгон дээр хариуцлагаа хүлээхгүй байгаа юм бэ

Миний ард сууж байгаа багш нар байна, залуучууд байна. Бид энэ их сургуульд орж ирээд амжилтанд хүрсэн юм аа. Олон Улсын таквендогоор хичээллээд дэлхийн аваргын хошой мөнгөн медаль, азийн аварга зэрэг нэр хүндтэй улсдаа нэмэр оруулж буй энэ медалиудыг бид нар авчирч чадсан юм аа.

Тэгвэл 21 аймгийн залуучуудыг ямар ч боловсролгүй, У Ү үсгийг ялгадаггүй гээд эцэг эхчүүд залуучууд ямар их гомдож байна гээч. Тухайн үед намайг Баянхонгорт байхад мэдэгдэл хийсэн. Тэр үед та нар яагаад мэдэгдэл хийхгүй байгаа юм бэ.

Биднийг яагаад доромжилж байгаа юм бэ гэж асууж байна. Та хөдөө орон нутгийн залуучууд, эцэг эхчүүд, багш нараас яг одоо уучлалт гуй. Хэрвээ уучлалт гуйж чадахгүй өи бол энэ багш нар болон хөдөө орон нутгийн азлуучуудын нэрийн өмнөөс ямар нэгэн байдлаар тэмцлийн хурц хэлбэрт шилжих болно. Магадгүй миний хэлсэн үгийг үг гэж тоохгүй бол би өөрийгөө зулын гол болгоход ч бэлэн байгаа шүү” гэв.