Амины төлөөстэй хойдох амьдрал 

2020 оны 09 сарын 22

Нар манддагаараа мандаж,  хүн бүр ажил албандаа яаран амьдрал урьдын адил үргэлжилнэ. Гэвч энэ дунд ганц бяцхан биендээ ахадсан хатуу харгислалыг тэвчин  бидний дунд чимээгүй  цохилж явсан  нэгэн зүрх зогсчээ.  Өнөөдөр халаглавч маргааш, нөгөөдөр... Цаг хугацаа өнгөрөхөд бүгд мартана. Хаалттай хаалганы цаана  дахиад хэдэн хүүхдэд  ийм аюул заналхийлж байгааг  бид мэдэхгүй. 

Хэвлэл мэдээллийн хэрэгслээр гарсан мэдээллээс харахад талийгаач охиныг бие махбодь сэтгэл санааны хүнд хэлбэрийн хүчирхийлэл дарамтад амьдруулж байсан нь илт. Төрүүлсэн эх нь “Хэн нь буруутайг мэдэхгүй. Манай нөхөр архины хамааралтай хүн биш. Хүүхдүүдээ зоддоггүй”  гэх зэргээр хүчирхийлэгчийг хайцаалсан өнгө аястай зүйл ярьсан гэх. 

Харин ангийн багш, сургуулийн нийгмийн ажилтан, сургуулийн захирал, хорооны нийгмийн ажилтан гээд хаалттай хаалганы цаадах хүчирхийллийг тандаж мэдээлэх, сэргийлэх, туслах үүрэгтэй хүмүүст талийгаач охины ар гэрийн нөхцөл байдлын талаар үнэн мэдээлэл огт байсангүй. Бүгд мөрөө хавчин “Цагдаагийн байгууллага шалгана” гэх жижүүрийн үгээр ам таглах аж. 

Цогцост хийсэн задлан шинжилгээний урьдчилсан дүгнэлтээр гэр бүлийн орчинд үйлдэгдсэн харгислал дарамт, зодуур нүдүүр  хүчирхийлэл дунд байсныг нь хөөрхий охины хугараад бороолж эдгэсэн хавирганууд, ил харагдах хуучирсан шарх сорви, дотор эрхтэнд нь үүссэн үхэлд хүргэсэн гэмтлүүд нотолно.  Нэг гэрт хамт амьдардаг хэрнээ алгын чинээ охинд  хойд эцгээс ирж буй зодуур, харгислалыг мэдээгүй байх боломж тэр эхэд байх учиргүй.

Тэгвэл Гэр бүлийн тухай хуульд хүний   эцэг,  эх байх эрхийг дараах тохиолдолд хасахаар зүйлчилжээ.

Тодруулбал  “Эцэг, эх  байх эрхээ урвуулан ашигласан /хүүхдээ хаях, санаатай төөрүүлэх, тарчлаан зовоох, худалдах, барьцаалах, биеийг нь үнэлэх, шунахай зорилгоор ашиглах, эрх зүйн зөрчилд татан оруулах зэргээр/, хүүхэдтэйгээ удаа дараа хэрцгий харьцсан” гэж тодорхой зааж. Өөрөөр хэлбэл тэд охиныг гэртээ байлгаж, дүүг нь асруулж, гар хөлийн үзүүрт бүлтэлзүүлэн зарж байхдаа хэдийнээ  эцэг, эх байх  эрхээ хасуулчихсан байж.

Гэр бүлийн хүчирхийлэлтэй тэмцэх тухай хууль, Хүүхэд хамгааллын тухай хуульд хүүхдийг хүчирхийллээс хамгаалах, урьдчилан сэргийлэх, мэдээлэх үүрэг болон Хамтарсан баг хэрхэн ажиллах тухай тодорхой заасан байдаг ч бодит байдал дээр хэрэгждэггүй.

Уг нь энэ хуулиудаар  охины ангийн багш, өрхийн эмч, хорооны нийгмийн ажилтан нар биед нь үүссэн хөхрөлт, няцралтыг шалгаж, нөхцөл байдлыг үнэлж, хүчирхийллийг таслан зогсоох үүрэгтэй байв. 

Хүүхэд гэр бүлийн хүчирхийлэлд өртсөн, өртсөн байж болзошгүй гэж үзвэл төрийн, төрийн бус байгууллагын ажилтан, хуулийн этгээд, бусад этгээд цагдаагийн байгууллагад, цагдаагийн алба хаагчийн эзгүйд сум, багийн Засаг даргад болон хүүхдэд яаралтай тусламж үзүүлэх утасны үйлчилгээнд мэдээлэх үүрэгтэй гэж заажээ. Хэн мэдээлснийг хуулийн байгууллагынхан нууцлах үүрэгтэй бөгөөд задруулсан этгээд мөн хуулийн хариуцлага хүлээх  зэргээр боломжийн хэмжээнд хуулийн зохицуулалттай. 

Харин хуулиар хүлээсэн үүргээ төрсөн эх, хойд эцэг, хөрш, багш, нийгмийн ажилтан, хэсгийн ахлагчийн хэн нь ч биелүүлсэнгүй. Нөгөөтэйгүүр Монголын төр иргэндээ, хүүхэддээ ээлгүй, гэр бүлийн асуудалд хойрго хандаж ирсний гор ингэж гарав. 

Хэдхэн жилийн өмнө болсон ч бүгд мартсан 4 настай охины  үхэл. Дулаан хөнжилдөө эрхлэлдэх залуу хос Цогт, Маралмаа нарын  хоёр дахь амьдрал амины төлөөстэй байсан юм. Дөрөвхөн настай бяцхан  охиноо зодсоор байгаад алчихсан  төрсөн эцэг шүүхийн өмнө уучлал гуйж, тэнгэр шиг гэдэстэй Маралмаа шоронд хүүхдээ төрүүлж байв. 

Харин өнөөдөр. Хоёрын хоёр охин хүүхдээ харгис эрийн мэдэлд даатгасан эх  нэгийнх нь амийг зольчихлоо. Үлдээж хоцорсон 12 настай хөгжлийн бэрхшээлтэй охин, бага насны  нэг хүүхэд,  удахгүй мэндлэх бас нэгэн зүрх. Ямар ирээдүй, ямар хүчирхийлэл тэднийг хүлээж байгааг төсөөлөхөд ч бэрх.  

Яг үнэндээ бол нийтлэлч Р.Эмүжингийн бичсэнчлэн “Чи өсгөж чадахгүй бол иргэнээ улс нь мэдээд авъя" гээд гэдийчихдэг цөлх хөх өвгөд шиг хүнлэг төрийг л хүсч байна.”

С.Отгон 

Сэтгэгдэл (2)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 09 сарын 22
103.229.123.53
Зочин

Эргүй л бол үхчих гээд байдаг юмуу.охин үрээ хайрлаж өсгөх үүрэгтэй шүү дээ

2020 оны 09 сарын 22
210.61.207.4
namuun

eooo.ochigdoroos hoish tavgui blaa.ymar aimaar hatuu eh ve.torson huuhdee aluulchihaad ter aluurchinaa omoorson bn le.ene 2-iig chimeeguihen alaad ogooch.jiremsen gsen.ter huuhdiig garguulj yah yum.uldsen 2 huuhdiig n uls hamgaalaltand avah heregtei.boovgui bol mgl huuhnuud uheh n.ur huuhed n hamaagui.yun gahai nohoi shig olon tordog yum.huhai guilagchin bj.