Ким Сү Хёнь: Би Ким Сае Ронтой насанд хүрээгүй байхад нь үерхээгүй

Өмнөд Солонгосын алдарт жүжигчин Ким Сае Роны үхэлд буруутгагдаад байгаа жүжигчин Ким Сү Хёнь хэвлэлийн бага хурал хийж албан ёсоор тайлбар мэдээлэл өглөө. 

Тэрбээр хэвлэлийн бага хурлынхаа эхэнд талийгаачийг амар тайван явуулж чадахгүй байгаадаа уучлалт гуйж, эмгэнэл илэрхийллээ. 

Мөн Ким Сае Роны гэр бүл, нагац гээд байгаа хүн, "Garosero" нарын эсрэг гүтгэлэг үйлдсэн, өөрт нь 12 тэрбум воны гэм хор учруулсан гэх өргөдлөө шүүхэд гаргажээ.

Ким Сү Хёнь: "Би Ким Сае Роныг насанд хүрээгүй байхад нь үерхээгүй. Бид хоорондоо ах дүүсийн сайн харилцаатай байсан. Талийгаач бид хоёр 2020 онд "Нулимсны хатан хаан" цуврал гарахаас өмнө буюу дөрвөн жилийн өмнө нэг жил орчим үерхсэн. Хэсэг хугацааны дараа салсан. Тэрнээс хойш өмнөх шигээ холбогдохоо больж харилцаа дууссан.

Ким Сае Рон бид хоёрын харилцааг ашиглан түүний гэр бүлийнхэн нь мөнгө нэхдэг байсан. Сае Рон үргэлж стресстэй байдаг байсан. Надаас болон манай агентлагаас ирсэн дарамтаас болж амиа хорлосон гэдэг мэдээлэл худлаа. 

Сае Роныг нас барсныг сонсоод сэтгэл зүй маань тогтворгүй болж маш их хямарснаас болж оршуулгад нь оролцож чадаагүй. Энэ хугацаанд чимээгүй байсан нь үр хүүхдээ алдсан гэр бүлд илүү их шарх өгөхийг хүсээгүй.

Одоо гэр бүлийнх нь цацаад байгаа дуу бичлэг машины осол хийсний дараа төлсөн төлбөртэй ямар ч холбоогүй, жилийн өмнөх харилцан яриа байсан. Би өөрийнхөө хийгээгүй зүйлийг хийсэн гэж хэлж чадахгүй. Би өөрөө 2016, 2018, энэ жилийн чатуудаа шинжлүүлэх болно. 

Өнөөдрийг хүртэл би өөрийгөө зоригтой гэж боддог байлаа. Гэвч ингээд мэдээлэл хийгээд суух нь надаас асар их зоригийг шаардлаа. Гэхдээ энэ асуудалд би буруугүй. Өөрийнхөө буруугүй гэдгийг батлан харуулах болно" гэлээ.