В.Путин Энэтхэгт хүрэлцэн очлоо

ОХУ-ын Ерөнхийлөгч В.Путин Энэтхэгт төрийн айчлал хийхээр хүрэлцэн очлоо. Тэрбээр шөнө очсоныхоо дараа Энэтхэгийн "India Today" телевизэд ярилцлага өгсөн байна.

Харин айлчлалын гол үйл явдлууд буюу Ерөнхийлөгч Драупади Мурму, Ерөнхий сайд Нарендра Модитой хийх уулзалт зэрэг нь өнөөдөр өрнөх юм.

АНУ-ын Ерөнхийлөгч Д.Трамп ОХУ-аас газрын тосны бүтээгдэхүүн худалдаж авсны учир Энэтхэгт гаалийн татвар ногдуулна гэж занасан нь ОХУ, Энэтхэгийг ойртоход хүргэсэн гэдэг дүгнэлт хэвлэлээр бичигдсэн хэвээр, одоо байгаа харилцаа айлчлалын үр дүнд хэрхэн өргөжих нь анхаарал татсан сэдэв хэвээр байна.

Тодруулбал, хоёр улс улс төр, худалдаа, эдийн засаг, шинжлэх ухаан, технологи, соёл, хүмүүнлэгийн салбараас гадна геополитик, зэвсэглэл, газрын тос зэрэг стратегийн салбарт өргөн хүрээтэй хэлэлцээр өрнүүлэхээр төлөвлөж байна. Тодруулбал, Энэтхэг, ОХУ хоёр улс АНУ-ын бодлогыг хамт сөрнө гэдгээ тунхаглах айчлал болно гэж хэвлэлүүдэд бичиж байгаа юм.

ЭНЭТХЭГ УЛС АНУ, ОХУ-ЫГ ТЭНЦВЭРЖҮҮЛЖ, УКРАИНЫ АСУУДАЛД БАРУУНЫ АШИГ СОНИРХЛЫГ ИЛЭРХИЙЛЭХГҮЙ

Барууны орнууд Энэтхэгийг бүс нутгийн хүчирхэг тоглогч болохынх нь хувьд Украины асуудлаар ОХУ-д шахалт үзүүлэхийг ил тод шаардаж ирсэн ч Н.Моди  хэлэлцээрт уриалахаас илүү алхам огт хийгээгүй юм.  

Кремлийн хэвлэлийн албаны мэдээлснээр, В.Путин айлчлалынхаа үеэр Энэтхэгийн Ерөнхийлөгч Драупади Мурмутай уулзаж, Орос-Энэтхэгийн 23 дахь дээд хэмжээний уулзалтад оролцоно. Мөн Ерөнхий сайд Нарендра Моди тэргүүтэй Энэтхэгийн төлөөлөгчидтэй дээр дурдсан салбарт хамтын ажиллагаагаа өргөжүүлэх гэнэ.

ЭНЭТХЭГ УЛС ТУСГААР ТОГТНОХООС Ч ӨМНӨ ЭХЛҮҮЛСЭН МОСКВА, ДЕЛИГИЙН ХАРИЛЦАА

Энэтхэг, ЗХУ 1947 оны 4-р сарын 13-нд (Энэтхэг улс Их Британиас албан ёсоор тусгаар тогтнолоо зарлахаас дөрвөн сарын өмнө) дипломат харилцаа тогтоосон байдаг. Улмаар 1991 оны 12-р сарын 26-нд Бүгд Найрамдах Энэтхэг Улс Орос улсыг ЗХУ-ын хууль ёсны залгамжлагч гэж хүлээн зөвшөөрчээ. 1993 оны 1-р сард Оросын Ерөнхийлөгч Борис Ельциний Энэтхэгт хийсэн албан ёсны айлчлалын үеэр 1971 оны өмнөх хэлэлцээрийг орлосон Найрамдал, хамтын ажиллагааны гэрээнд гарын үсэг зурсан.

В.Путин төрийн эрхэнд гарснаар хоёр улсын харилцааны онцгой тааламжтай үе эхэлсэн гэж үздэг бөгөөд тэрбээр 2000 оны аравдугаар сард анх Энэтхэгт айлчилж, Стратегийн түншлэл байгуулж, 2010 онд харилцааны статусыг онцгой, давуу эрх бүхий стратегийн түншлэл болгон сайжруулсан. Энэ удаагийн айлчлал нь Энэтхэгт хийж буй 10 дахь удаагийн айлчлал бөгөөд дунджаар 2.5 жилд нэг удаа айлчилжээ. Одоогийн байдлаар хууль эрх зүйн хүрээ нь 250 гаруй баримт бичигтэй. Энэтхэгийн төр, Засгийн тэргүүнүүд Москвад айлчилсныг тооцвол бараг жил бүр харилцан өндөр түвшний айлчлал хийдэг бөгөөд 22 удаагийн дээд түвшний уулзалт хийжээ.

Гэхдээ, энэ удаагийн айлчлал нь ОХУ Украинд цэрэг оруулснаас хойших В.Путины Энэтхэг улсад хийж буй анхны айлчлал гэдэг нь олон улсын нөхцөл байдлыг таамаглах нэг шинж болж чадаж байна. Учир нь, дайны эхний жилүүдэд В.Путин улсаасаа огт гардаггүй байсан билээ. 

Бид удахгүй түүний Энэтхэгийн "India Today" телевизэд ярилцлагын гол агуулгыг хүргэх болно.