Эдийн засгийн сайдад горилж буй хувийн бизнесээ дэмжигч гишүүд

Цэц "давхар дээл"-ийн хязгаарлалтыг "ХАЛЖ", УИХ-ын гишүүд сайд болох амбицаа илэрхийлсээр байна. Хугацаа богинохон, сайдын суудал хязгаартай учраас зарим намынхаа томчуудыг "идчих нь холгүй" байна.

Араандаа хийсэн гишүүд сайд болох хүсэлдээ хөтлөгдөн хаа сайгүй зусардалт, тохироо өрнөж, хэрүүл тэмцэл ч бас болж байгаа сурагтай.

Энэ дунд шинээр байгуулагдсан Эдийн засаг хөгжлийн сайдын суудалд сонирхолтой эрхмүүд горилж байгаа нь Ч.Хүрэлбаатар, Ж.Ганбаатар, Б.Чойжилсүрэн нар юм.

Ч.Хүрэлбаатарын хувьд өнөөдрийн эдийн засгийн уналт, доройтлын "шалтгаан" гээд хэлчихэд хилсдэхгүй. 32 настайгаасаа Ерөнхий сайдын Эдийн засгийн зөвлөх, ТНБД зэрэг хашиж үзээгүй албан тушаал бараг л үгүй. Түүнчлэн Ч.Хүрэлбаатар УИХ-д дөрвөн ч удаа сонгогдож байсан бөгөөд хамгийн удаан хугацаанд Сангийн сайдаар ажиллаж байсан нэгэн юм.

"Монголын эдийн засагт үүр цайлаа" хэмээн ном бичиж байсан Ч.Хүрэлбаатарыг Сангийн сайдаар ажиллаж байх явцад СААРАЛ, ХАР жагсаалтад орж байв. Түүнд намын нөхөд нь ч итгэдэггүй. Чуулганы индэр дээрээс Ж.Мөнхбат, Х.Болорчулуун нарын гишүүд "Оюу толгой", "Хотгор шанага"-ын асуудалтай холбож, дэмжихгүй гэдгээ хэлж байв. Түүний эрх мэдэл, эд хөрөнгөө бататгаж, арвижуулахын төлөө хийсэн хууль бус үйлдлүүдийг үеийн үед олон нийтэд ил болж байсан ч аль ч цаг үед сандал суудалтайгаа “тунаж” үлддэг.

Ж.Ганбаатар гишүүний хувьд УИХ-д хоёронтоо сонгогдсон ч хийж бүтээсэн зүйл бараг үгүй. Гишүүн байх хугацаанд нь сонгогдсон дүүрэг нь биш хувийн бизнес нь өргөжин тэлсээр өнөөдрийг хүрсэн. Хотын үнэ цэнтэй, ашигтай газар бүрд л нэр холбогдох болсон нь нууц биш. Сүүлийн жишээ гэвэл хотын төвд байрладаг "Зорчигч тээвэр гурав"-ын газрыг дээрэмдэж байсан цаг саяхан. Улмаар тухайн газарт барилга барихдаа хууль тогтоомж, стандарт зөрчиж, ойр орчимд амьдардаг иргэдийн эрүүл аюулгүй орчинд амьдрах эрхийг зөрчсөөр байна.

УИХ-ын гишүүнээр олон удаа сонгогдсон, Сангийн сайдаар ажиллаж байсан Б.Чойжилсүрэнгийн "балаг" өмнөх хоёр эрхмээс дутахгүй. Нийслэл дэх өнгөтэй өөдтэй гэсэн газруудыг өөрийн болгож дээр нь барилга байшин барьж хөрөнгөжсөн гэлцдэг эрхэм гишүүн Сангийн сайд 19 тэрбум төгрөгөөр сургууль цэцэрлэгийн барилгаа улсад зарж байсан түүхтэй. Түүний “Шинжиан Шинфа” ХХК-д олгуулсан гэх зээл, Тост Тосон бумбын ордны асуудал зэрэг түүний холбогдсон, оролцсон асуудал олон.

Төрийн жолоог олон жил атгаж, олон удаа ард түмнийг төлөөлж, сайдаар хүртэл ажиллаж байсан дээрх гурван эрхэм улс орныг хөгжүүлэх гэхээсээ илүү хувийн ашиг сонирхол, бизнесээ дэмждэг. Татвар төлөгчдийн мөнгийг үр ашиггүй зарцуулдаг хүмүүсийг сайдаар сонгох нь дэмий л болов уу. Улс орны эдийн засаг хүнд байгаа энэ үед олон удаа итгэл алдсан биш тулгамдсан асуудлыг шийдэж чадах, улс орноо хөгжүүлж чадах хүнийг Эдийн засгийн хөгжлийн сайдаар томилох нь зүйтэй биз.