М.Буяндэлгэр: Хөшигийн хөндий орчимд 3,171 иргэн, ААН-ийн газрыг чөлөөлнө

Өнөөдөр Газрын харилцаа геодиз, зураг зүйн газраас цаг үеийн асуудлаар мэдээлэл хийлээ.

Хэвлэлийн хурлын үеэр тус газрын орлогч дарга М.Буяндэлгэр "Хөшигийн хөндийд газар чөлөөлөлтийн ажиллагаа явуулж байгаа. Энэ хүрээнд газар чөлөөлөлтийн нөхөн олговор тооцох, чөлөөлөх газрыг тодорхойлох гэх мэт ажлуудыг хийхээр сонсох ажиллагааг зохион байгуулж байна. Энэ жил наймдугаар сарын 15-н хүртэл үргэлжлэх бөгөөд 435 иргэн, ААН-ийн газрын эзэмших эрхийг цуцлах тооцоо гараад байгаа. Эдгээр иргэн, ААН-үүд Төв аймгийн Газрын харилцаа, барилга хот байгуулалтын газарт хандаж, Захиргааны ерөнхий хуулийн дагуу тайлбар саналаа гаргах хэрэгтэй. Тэгэхгүй бол таны эзэмшиж байгаа газрын зөвшөөрөл хүчингүй болно. Сонсох ажиллагаа нь иргэн, ААН-ийн эрх ашгаа хамгаалах арга хэмжээ гэдгийг ойлгоорой. 

Нийтдээ 3,171 иргэн, ААН-ийн газар нөлөөлөлд өртөж байгаагаас ойролцоогоор 25 хувь нь ирж уулзаж, тайлбар саналаа өгөөд байна. Тайлбар саналаа өгөөгүй тохиолдолд газрын зөвшөөрөл хүчингүй болно. Энэ бүх газрын зөвшөөрлийг хүчингүй болгоно гэж байгаа юм биш. Тайлбар саналаа ирүүлээд газар авахдаа холбогдох хууль тогтоомжийг зөрчөөгүй гэдгээ баталж чадвал газар шилжүүлэх эсвэл нөхөн олговор авах нөхцөл бүрдэнэ. 

Газрын гэрчилгээ олгохтой холбоотой бас нэг зөрүүтэй ойлголт үүсээд байгаа талаар мэдээлэл өгье. Иргэнд газар эзэмшүүлж, өмчлүүлэх үйл ажиллагаа зөвхөн газрын албанаас хамааралтай биш байдаг. Газрын зөвшөөрөл авах хүсэлтийг 30 хоногт багтаан шийдвэрлэсэн ч УБЕГ-аас Е дугаар гэж авдаг. Тус дугаарыг 30-60 хоногт багтаан олгодог бөгөөд газрын албаныхан тус дугаарыг хүлээж байгаа тул газрын гэрчилгээг нь шууд хэвлээд өгөх боломжгүй байдаг. Үүнийг иргэд харахдаа газрын байцаагч, газрын албаныхан авлига хүлээгээд байна гэж ойлгоод байгаа. Энэ асуудлыг эрх зүйн хувьд шийдэж өгөөч гэсэн хүсэлтийг Хууль зүй дотоод хэргийн сайдад өгөөд байна" хэмээн ярилаа.