Н.Сугар: Нийтийн тээврийн шинэчлэлийг цаашид үргэлжлүүлнэ

Нийслэлийн Хэвлэл мэдээлэл, олон нийттэй харилцах төвийн дарга Н.Сугар Нийтийн тээврийн шинэчлэлтэй холбоотой асуудлаар мэдээлэл өглөө. Түүний өгсөн мэдээллээс хүргэж байна.

-Иргэдээс ирсэн гомдлын дагуу нийтийн тээврийн зарим маршрутыг сэргээсэн. 100 хувийн шинэчлэлээс 35 хувийг нь сэргээж, үлдсэн 65 хувийг нь цааш үргэлжлүүлнэ.

-Сонгууль ойртсон амаргүй цаг ч гэлээ шинэчлэлийг яаралтай хийх ёстой. Нийтийн тээврийн шинэчлэлийг хэрэгжүүлэхгүй л бол замын түгжрэл арилахгүй гэдгийг иргэд маань ойлгох хэрэгтэй.

-Автобус чөлөөтэй зорчиход саад болоод байсан учраас Энхтайвны өргөн чөлөө орчмын халаас зогсоолуудыг хаасан.

-Автобусны буудлын мэдээлэх самбаруудыг илүү ойлгомжтой болгохоор ажиллаж байна. Хугацаа шаардах ч ойрын хоногуудад дуусгана.

-Процессын алдаа гарсныг хүлээн зөвшөөрч байна, үүндээ хүлцэл өчье.

-Нийтийн тээвэрт шаардлагагүй чиглэл гэж байхгүй. Тухайн байршилд байгаа хүмүүсийн хэрэгцээг шийдэх л ёстой.

-Улаанбаатар урт сунасан байрлалтай хот учраас түгжрэлийн үед нэг талдаа таг зогсдог. Тийм учраас Энхтайвны өргөн чөлөө байнга, тасралтгүй нэвтрүүлж байх ёстой гэсэн зарчимыг мэргэжлийн хүмүүс хэлж байгаа.

-БНХАУ-аас ирж явсан автобус осол гаргасан. Хоёр хүн нас барсан гэсэн мэдээлэл бидэнд ирсэн. Цаашид харамсалтай явдал гаргахгүйн тулд аюулгүй байдлаа хангаж ажиллаж байна.

-Нийтийн тээврийн шинэчлэл зөвхөн маршрутаар зогсохгүй. Парк шинэчлэл, төлбөрийн системийн шинэчлэл гээд үргэлжилж байгаа.

-Нийтийн тээврийнхэн гурав хоног гэртээ хариагүй. Үйлчилгээ 22.00 цагт зогссоны дараа дүн шинжилгээ, нэгтгэн дүгнэх, шийдвэр гаргах ажлуудыг хийж байна.