Дүнжингаравын осолд холбогдсон Э.Мөнхнарангийн аав, дүү нь шүүхээс ял авч байжээ

Нийслэлийн Баянзүрх дүүргийн 26 дугаар хорооны нутаг, Дүнжингарав захын баруун урд уулзварт энэ сарын 23-наас 24-нд шилжих шөнийн 01.04 цагийн орчимд Дашваанжил ХХК-ийн эзэмшлийн, байгалийн хий ачиж явсан том оврын цистерн “Ниссан патрол” суудлын автомашинтай мөргөлдсөн зам тээврийн осол болсон билээ.

Уг осолтой холбоотойгоор цистернээс байгалийн хий алдагдаж, улмаар хүчтэй дэлбэрэлт болж, дөрвөн хүн нас барж, 10 гаруй хүн түлэгдэж гэмтсэн. Мөн ойролцоо зогсож байсан 30 гаруй автомашин болон орон сууцны барилга шатсан түймрийн гамшиг дэгдсэн байдаг. Тиймээс хуулийн байгууллага осолд холбогдсон жолооч Ч.Рэнчиндорж, Э.Мөнхнаран нарыг түр сатуулж, ослын нөхцөл шалтгааныг тогтоох ажиллагааг явуулж буй. 

Zuv.mn уншигчдадаа жолооч нарын талаарх мэдээллийг бэлтгэн хүргэж байна.

Ч.Рэнчиндорж гэж хэн бэ 

“Дашваанжил газ” ХХК-ийн цистерн машиныг жолоодож явсан Чулуунбаатарын Рэнчиндорж нь 1963 онд төрсөн, бүрэн дунд боловсролтой. Жолооч мэргэжилтэй, B, C, D, E ангилалтай, “Аюултай ачаа болон овор ихтэй, урт хүнд ачаа тээврийн мэргэшсэн жолооч нэгэн аж. 

Анх ажлын гараагаа жолоочоор эхэлж, өнөөдрийг хүртэл 40 шахам жил жолоочоор ажиллажээ. 1984 онд 21 настайдаа Авто тээврийн удирдах газарт жолоочоор ажилд орж, 20 жил тасралтгүй ажилласан. 2004-2008 онд МТТ тээвэр зуучийн газар, 2008-2019 онд СОЛОТ тээвэр зууч компанид жолооч, 2019 оноос осолд холбогдох хүртлээ Дашваанжил ХХ-д жолоочоор ажиллаж байжээ.

Урьд нь ямар нэгэн хэрэг, асуудалд орж байсан тухай нээлттэй мэдээлэл байхгүй.

Э.Мөнхнаран гэж хэн бэ

Осолд холбогдсон “Ниссан патрол” маркийн автомашиныг жолоодож явсан Э.Мөнхнаран нь ам бүл дөрөв, эхнэр хүүхдүүдийн хамт амьдардаг. Осолд холбогдох үедээ БХЯ-ны Барилга захиалагчийн алба Төрийн Өмчит Аж Ахуйн тооцоот Үйлдвэрийн газарт захирлаар ажилладаг бөгөөд унаж явсан “Ниссан Патрол” маркийн автомашин байгууллагынх нь нэр дээр бүртгэлтэй байсан. 

Э.Мөнхнарангийн аав Содномбалжирын Эрдэнээ нь Хэнтий аймгийн Бор-Өндөр сумын VI багийн Засаг даргаар ажиллаж байхдаа тус сумын Засаг даргын Тамгын газрын санхүүгийн албаны даргаар ажиллаж байсан Б.Г тай бүлэглэн худал тоо, мэдээлэл, тодорхойлолт гаргах замаар бусдыг “Малчдын хөдөлмөр эрхлэлтийг дэмжих хөтөлбөр”-т хамруулж, эрх мэдэл, албан тушаалын байдлаа урвуулан ашиглаж бусдад давуу байдал бий болгосон гэмт хэрэг үйлдэж байжээ.

ХЭНТИЙ АЙМГИЙН БОР-ӨНДӨР СУМ ДУНДЫН ШҮҮХ С.Эрдэнэд “Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгосон гэмт хэргийг үйлдсэн гэм буруутайд тооцож” ял ногдуулсан гэх мэдээлэл Шүүхийн мэдээллийн санд байна /https://shuukh.mn/single_case/.../. 

Мөн Э.Мөнхнарангийн дүү Эрдэнээгийн Мөнхдөл нь 2016 оны арванхоёрдугаар сарын 26-ны өдөр Баянгол дүүргийн Эрүүгийн Хэргийн Анхан Шатны Шүүхийн 06 дугаар Шийтгэх тогтоолоор “Эрүүгийн хуулийн тусгай ангийн 181 дүгээр зүйлийн дүгээр зүйлийн 181,2,1 дэх хэсэг, “Бусдыг илтэд үл хүндэтгэн хүч хэрэглэж, нийгмийн хэв журмыг ноцтой зөрчин догшин авирлаж танхайрах гэмт хэрэг үйлдсэн” гэмт хэрэгт буруутай нь тогтоогдож, гурван жил, нэг сарын хорих ял шийтгүүлсэн мэдээлэл нээлттэй эх сурвалж дээр тавигджээ /https://shuukh.mn/single_case/.../.