Дорноговь аймагт 12 настай охины амь насыг онц хэрцгийгээр хохироосон этгээдэд эрүүгийн хэрэг үүсгэж, Прокурорт хүргүүлжээ

Дорноговь аймгийн Сайншанд сумаас аравдугаар сарын 03-ны өдөр 12 настай охин сургуульдаа явах гэж гараад сураггүй алга болж, бусдын гарт амиа алдсан хэргийн талаар бид өмнө мэдээлж байсан. 

Тухайн үед охиныг авч явсан этгээдүүдийн тээврийн хэрэгсэл, маршрут ил болж Дорноговь аймгийн Мандах сумаас Өмнөговь аймгийн Манлай сум хүртэлх чиглэлд хайж эхэлсэн билээ. Тэгвэл охины цогцсыг эрлийн дөрөв дэх өдөр Дорноговь аймгийн Мандах сумаас олжээ. Хэрэгтэн болох "Г"-г цагдан хорин шалгаж эхэлсэн. Тэгвэл түүний хэргийг шүүхэд шилжүүлэх саналыг прокурорын байгууллагад хүргүүлжээ. 

Мөрдөн байцаах албанаас иргэн “Г”-д холбогдуулан 2023 оны 10 дугаар сарын 03-ны өдөр насанд хүрээгүй хүнд хүч хэрэглэж, биеэ хамгаалах, эсэргүүцэл үзүүлэх чадваргүй байдлыг ашиглаж эрхшээлдээ оруулан хүн хулгайлсан, улмаар 2023 оны 10 дугаар сарын 04-ний өдөр онц харгис хэрцгийгээр, өөр гэмт хэргийг нуун далдлах, хялбарчлах зорилгоор, хохирогчийн биеэ хамгаалж чадахгүй бага насны хүүхэд болохыг мэдсээр байж амь насыг нь хохироосон үйлдэлд Эрүүгийн хуулийн 10.1 дүгээр зүйлийн 2 дахь хэсгийн 2.1, мөн хэсгийн 2.4, мөн хэсгийн 2.7, мөн хуулийн 12.1 дүгээр зүйлийн 4, мөн хуулийн 13.2 дугаар зүйлийн 2 дахь хэсгийн 2.1-д тус тус зааснаар эрүүгийн хэрэг үүсгэн, яллагдагчаар татаж, мөрдөн шалгах ажиллагааг дуусган хэргийг шүүхэд шилжүүлэх саналтай Нийслэлийн Прокурорын газарт хүргүүлжээ.