Шадар сайд С.Амарсайхан хүүгээ ТӨРИЙН МӨНГӨӨР сургана гэв үү

Монгол улсын шадар сайд С.Амарсайхан албан тушаалаа урвуулан ашиглаж, халдвар хамгааллын дэглэм зөрчин, эхнэрээ ХӨСҮТ-ийн ''улаан бүсэд'' оруулаад гаргасан асуудлыг бид өмнө хөндөж мэдээлсэн. Тэгвэл энэ удаа шадар сайд хүү А.Эрдэнэхүслэнгээ гадаадын их сургуульд сургахын тулд төрөөс санхүүжилт авсан гэх баримтууд цахим ертөнцөд цацагдаад байна. 

Тодруулбал, А.Эрдэнэхүслэн нь Их Британийн Бристолын их сургуульд суралцах төлбөр болох 27,166 ам.доллар буюу 77,423,100 /далан долоон сая дөрвөн зуун хорин гурван мянга нэг зуун/ авсан бөгөөд, уг зээл энэ оны хоёрдугаар сарын 16-ны өдөр олгогджээ.

Боловсролын зээлийн сангийнхан уг зээлийнх нь санхүүжилтийг  С.Амарсайханыг  Шадар сайд болсноос нь ердөө 17 дахь хоногт буюу 2021.02.16-ны өдөр олгосон байв.

А.Эрдэнэхүслэнгийн авсан уг нэн хөнгөлөлттэй зээлийг авахын тулд маш өндөр шалгууруудыг хангах шаардлагатай байдаг. Суралцах хүсэл эрмэлзэл, сурлагын дүн зэрэг хүнд даваануудыг давсан ч төлбөрийн чадамжгүйгээсээ болж мөрөөдлийн сургуульдаа боловсрол эзэмшиж чадахгүй олон мянган Монгол залуучууд бий.

10 тэрбумаар үнэлэгдэх үл хөдлөх хөрөнгө, 225 сая төгрөгийн үнэт эдлэл, ''Эс Эс Монголиа'' уул уурхайн компани, ''Оюуны Ундраа'' компанийн эзэмшигч тэрбумтан, шадар сайд С.Амарсайханд энгийн иргэдийн адил хүүхдээ БШУЯ-ны харьяа Боловсролын зээлийн сангаас НЭН ХӨНГӨЛӨЛТТЭЙ зээл авч сургах шаардлага байсан эсэх нь эргэлзээтэй. 

Эхнэрийнхээ ''улаан бүсэд'' ороод, гарсан асуудлыг ''халдвар хамгааллын дэглэм зөрчөөгүй'' хэмээн хээв нэг хаацайлж суусан С.Амарсайхан энэ удаад хүүгийнхээ авсан 77 сая төгрөгийн зээлд ямар тайлбар хийхийг хүлээх үлдлээ.