Стратегийн ордын "хавсралт"-д багтсан 39 ордыг Стратегийн ордод тооцож, Баялгийн сангийн хуульд нийцүүлэн төрийн хувь эзэмшлийг тогтоох ажил үргэлжилж байгаа энэ үед уг хавсралтад багтсан Төгрөг нуурын нүүрсний ордыг ерөнхийлөгч асан Х.Баттулга 250 сая ам.доллараар зарсан гэх асуудал олон нийтийн анхаарлыг татаж буй.
Энэ асуудлаар Хууль зүйн сайд О.Алтангэрэлээс тодрууллаа.
-Төгрөг нуурын асуудал Засгийн газар дээр яригдсан уу?
-Яригдаагүй шүү дээ. Мэдэхгүй юм аа мэдэхгүй л гэе.
-АТГ-ын даргын томилгоо яригдах үед таны санаачилсан Хууль бусаар олж авсан хөрөнгийг хураах тухай хуулийн асуудлыг зарим гишүүд хөндөж байсан. З.Дашдаваа дарга танд энэ асуудлаар хариулт өгсөн үү?
-“Хууль нь гарсан тохиолдолд хэрэгжүүлж ажиллана” гэсэн.
-АН-ын бүлгээс таныг “Өөрийн багаа бүрдүүл” гэсэн зөвлөгөө өгсөн гэсэн?
-Хуулийн байгууллагад агентлагийн даргаар томилогдоход 10 жил, 05 жил ажилласан байх гэх мэт ажил мэргэжлийн шалгуур байна шүү дээ. Ямар ч байсан улс төрийн нөлөө оруулахгүйг хичээж байгаа. Гэхдээ мэдээж, агентлагийн дарга нар солигдох тохиолдол гарна шүү дээ. Манай агентлагийн дарга нар янз, янзын шалтгаанаар солигдож байна. Тэр болгонд нь хуулийн дагуу Засгийн газраар хэлэлцүүлээд томилж байгаа.
-Гэхдээ бүлгийн зүгээс ер нь тийм шаардлага дарамт ирдэг биз дээ. “ЦЕГ-ын даргыг соль” гэсэн асуудал ч яригдсан шүү дээ?
-Цагдаагийн байгууллагын талаар иргэдээс гомдол их ирдэг. Яг одоо Хууль зүйн яам дээр Ажлын хэсэг гарчихсан, цагдаагийн алба хаагчидтай холбоотой өргөдөл гомдлыг шалгаж байна. Удахгүй энэ талаар мэдээлэл өгнө. Удирдлагаас шалтгаалсан алдаа дутагдал, гүйцэтгэгчээс шалтгаалсан алдаа дутагдал гээд янз бүрийн л шалтгаантай байхыг үгүйсгэхгүй.
-Х.Баттулга гэдэг хүн хөрөнгөө нотолж чадахгүй хураалгах асуудал үүсвэл та энэ асуудалд ямар байр сууринаас хандах вэ?
-Энэ хууль Монгол Улсын Ерөнхийлөгч, УИХ-ын дарга, Ерөнхий сайд бүгдэд нь хамаатай. Хөрөнгөө нотолж чадахгүй, татвараа тайлагнаж чадахгүй бол хураалгана шүү дээ.
-Та Засгийн газраас байгуулсан Ухаа худаг ордыг хувьд шилжүүлэх үйл явц хуулийн дагуу явагдсан эсэхийг тогтоох ажлын хэсгийг ахалсан. Улмаар хууль бус гэж дүгнээд УИХ-д тогтоолын төсөл өргөн барьсан шүү дээ. Төгргөг нуурын ордыг хөндсөн нь үүнтэй холбоотой байж болох уу?
-Тогтоолын төсөл өргөн барьсан. УИХ-ын дарга нэмэлт материал шаардсан. Одоо тов хүлээж байгаа, өргөн барихад бэлэн. Яах вэ, янз янзын л юм болж байна. Гэсэн ч энэ үйл явц зогсох ёсгүй.
Зарим гишүүд хэлж байна лээ, “Шүүх тогтооно” гэж. Шүүх гэм бурууг тогтоодог. Гэтэл Ухаа худаг дээр 2007 оны тогтоол зөрчигдсөн. Бид хүүхдээ халуурахад духанд нь гараа хүргэж үзээд халуурч байна гээд эмчилдэг биз дээ. Түүнээс биш заавал нарийн мэргэжлийн эмч, MRI тогтооно гэдэггүй шүү дээ.
УИХ энэ асуудлыг хэлэлцэх ёстой. Тэндээс гаргасан шийдлийн дагуу Засгийн газар ажиллана. Орд эзэмшигчидтэй хэлэлцээрт орно.
Төгрөг нуурын орд зарагдсан гэж байна. Тэглээ гээд больж хаяхгүй шүү дээ. Хүн юмаа хулгайд алдчихаад “Өө өөр хүнд зарихсан юм байна, авахаа больё” гэдэггүй биз дээ. Хэчнээн олон улсын биржид гарсан байсан ч гэсэн хэлцэл хийх ёстой. Ард түмэн хувиа олж авах ёстой.
УИХ руу оруулж байгаа нь хэлцэл хийх эрхээ олж авья гэж байгаа юм. Зөвшөөрвөл хэлцэлд орно. Төр засаг чинь дээрэмчин биш. Гэхдээ Засгийн газар хууль биелүүлэх үүрэгтэй. Энэ дагуу тогтоол УИХ-д өргөн барьсан. Тэр нь батлагдаа ч үгүй байхад үйл явц их өрнөж байна.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна